শুকুৰবাৰে পুৱা পাকিস্তানৰ অশান্ত বেলুচিস্তান প্ৰদেশৰ এটা ব্যক্তিগত কয়লা খনিত ৰকেট লেঞ্চাৰ আৰু স্বয়ংক্ৰিয় অস্ত্ৰৰ সহায়ত অস্ত্ৰধাৰীয়ে চলোৱা আক্ৰমণত ২০ জন শ্ৰমিকৰ মৃত্যু হোৱাৰ লগতে আন ৮ জন শ্ৰমিক আহত হয়। মৃত লোকসকলৰ ভিতৰত অধিকাংশই আছিল আফগান নাগৰিক।
ঘটনা সন্দৰ্ভত জ্যেষ্ঠ আৰক্ষী অধীক্ষক মহম্মদ বালোচে কয় যে প্ৰদেশখনৰ ডুকি অঞ্চলত থকা জুনেইদ কয়লা কোম্পানীত এটা অস্ত্ৰধাৰী দলে আক্ৰমণ কৰি পাহাৰলৈ পলায়ন কৰে। ৰাষ্ট্ৰীয় ৰাজধানীত অনুষ্ঠিত হ’বলগীয়া চাংহাই কো-অপাৰেচন অৰ্গেনাইজেশন (এছচিঅ’)ৰ সন্মিলনৰ ঠিক পূৰ্বেই সংঘটিত এই আক্ৰমণে যথেষ্ট প্ৰতিক্ৰিয়াৰ সৃষ্টি কৰিছে।
বালোচে কয়, ‘এয়া সন্ত্ৰাসবাদী আক্ৰমণ আছিল আৰু খনিৰ শ্ৰমিকসকলে পলায়নৰ কোনো সুযোগ পোৱা নাছিল। শ্ৰমিকসকলে কাম আৰম্ভ কৰাৰ লগে লগে তেওঁলোকৰ ওপৰত গুলীচালনা কৰা হৈছিল’।
তেওঁ কয় যে সেই স্থানত প্ৰায় ৫০ জন শ্ৰমিক আছিল আৰু ইয়াৰে কিছুমানে ওচৰৰ পাহাৰত দৌৰি বা খনিৰ গভীৰতাত লুকাই প্ৰাণ ৰক্ষা কৰে।
