সাধাৰণতে এগৰাকী মহিলাৰ ঋতুস্ৰাৱ নহ’লে প্ৰথমে মনলৈ আহে গৰ্ভধাৰণ। পিৰিয়ডৰ অভাৱ সদায় গৰ্ভাৱস্থাৰ লক্ষণ বুলি গণ্য কৰা হয়। এই কাৰণতে মাহেকীয়া নোহোৱা হোৱাটো গৰ্ভাৱস্থাৰ লগত জড়িত হৈ আছে।
অৱশ্যে এই কথা প্ৰতিবাৰেই সঁচা হ’বই লাগিব বুলি ক’ব নোৱাৰি। মাহেকীয়া নোহোৱা হোৱাৰ আঁৰত আন বহুতো কাৰণ থাকিব পাৰে (Missed Periods Causes), যিবোৰৰ প্ৰতি মহিলাসকলে প্ৰায়ে গুৰুত্ব নিদিয়ে।
বিশেষজ্ঞসকলে ইয়াৰ কাৰণসমূহ দৰ্শাই কয় যে-
থাইৰয়ডৰ সমস্যা – থাইৰয়ড গ্ৰন্থিৰ পৰা নিৰ্গত হোৱা হৰম’নে ঋতুচক্ৰ নিয়ন্ত্ৰণত গুৰুত্বপূৰ্ণ ভূমিকা পালন কৰে। হাইপোথাইৰয়ডিজম (অনডাৰএক্টিভ থাইৰয়ড) বা হাইপাৰথাইৰয়ডিজম (অভাৰএক্টিভ থাইৰয়ড) দুয়োটাই ঋতুচক্ৰত প্ৰভাৱ পেলাব পাৰে। গতিকে পিৰিয়ড নোহোৱা হোৱাটোও থাইৰয়ড সম্পৰ্কীয় সমস্যাৰ লক্ষণ হ’ব পাৰে।
পলিচিষ্টিক অভাৰী চিণ্ড্ৰম (PCOS) – পিচিঅ’এছ হৈছে এক হৰম’ন বিকাৰ, যিয়ে মহিলাৰ অনিয়মিত মাহেকীয়া, অত্যধিক চুলি বৃদ্ধি আৰু ব্ৰণ আদি সমস্যাৰ সৃষ্টি কৰিব পাৰে। গতিকে বাৰে বাৰে মাহেকীয়া নোহোৱা হ’লে চিকিৎসকৰ পৰামৰ্শ লৈ পিচিঅ’এছ পৰীক্ষা কৰাব লাগে।
প্ৰ’লেক্টিনৰ মাত্ৰা বৃদ্ধি– প্ৰ’লেক্টিন হৈছে এনে এক হৰম’ন, যিয়ে স্তনপানৰ সময়ত গাখীৰ উৎপাদনত সহায় কৰে। কিন্তু যদি ইয়াৰ মাত্ৰা বেছি হয়, তেন্তে ই ঋতুচক্ৰত ব্যাঘাত জন্মাব পাৰে।
মানসিক চাপ– অত্যধিক মানসিক চাপে কৰ্টিছল হৰম’ন বৃদ্ধি কৰিব পাৰে, যিয়ে প্ৰজনন হৰম’নত প্ৰভাৱ পেলায় আৰু ঋতুচক্ৰ অনিয়মিত কৰি তুলিব পাৰে।
ওজনৰ পৰিৱৰ্তন– অতিৰিক্ত বা কম ওজন এই দুয়োটা অৱস্থাতে ঋতুচক্ৰ অনিয়মিত হ’ব পাৰে। হঠাৎ ওজনৰ পৰিৱৰ্তন মাহেকীয়াৰ ওপৰত প্ৰভাৱ পৰিব পাৰে।
ঔষধ- কিছুমান বিশেষ ঔষধ যেনে জন্ম নিয়ন্ত্ৰণৰ বড়ি, এন্টি-চাইকোটিক ঔষধ আৰু কিছুমান প্ৰকাৰৰ ষ্টেৰইড আদিয়েও ঋতুচক্ৰত প্ৰভাৱ পেলাব পাৰে।
ব্যায়াম- অত্যধিক শাৰীৰিক ব্যায়ামেও পিৰিয়ড অনিয়মিত কৰি তুলিব পাৰে।
অপুষ্টিকৰ খাদ্য- খাদ্যত অত্যাৱশ্যকীয় পুষ্টিকৰ উপাদান যেনে- আইৰণ, আয়’ডিন আদিৰ অভাৱেও ঋতুচক্ৰ অনিয়মিত কৰি তুলিব পাৰে।
প্ৰিমেচিউৰ ওভেৰি ফেইলাৰ (POF)-এই অৱস্থাত মহিলাৰ ডিম্বাশয়ৰ কাম অকালতে বন্ধ হৈ পৰে, যাৰ ফলত ঋতুচক্ৰ বন্ধ হৈ পৰে।
পেলভিক ইনফ্লেমেটৰী ডিজিজ (PID) – এই সংক্ৰমণে মাইকী প্ৰজনন অংগত আক্ৰান্ত আৰু মাহেকীয়া অনিয়মিত কৰি তুলিব পাৰে।
কিছুমান প্ৰকাৰৰ কৰ্কট ৰোগ – কিছুমান প্ৰকাৰৰ কৰ্কট ৰোগ আৰু ইয়াৰ চিকিৎসাৰ দ্বাৰাও ঋতুচক্ৰত প্ৰভাৱ পৰিব পাৰে।
পৰীক্ষা কেতিয়া কৰিব লাগে?
একেৰাহে দুমাহ বা তাতকৈ অধিক সময় মাহেকীয়া নোহোৱা হ’লে চিকিৎসকৰ লগত যোগাযোগ কৰিব লাগে। নিজৰ লক্ষণৰ ওপৰত ভিত্তি কৰি চিকিৎসকে প্ৰয়োজনীয় পৰীক্ষা কৰিব আৰু ঔষধ দিব পাৰে।
