কেৱল আধাৰ কাৰ্ড, পান কাৰ্ড অথবা ভোটাৰ আইডিৰ দৰে প্ৰমাণ পত্ৰ নিজৰ ওচৰত ৰাখিলে ভাৰতৰ নাগৰিক বুলি প্ৰমাণ নহয়। মঙলবাৰে বোম্বে উচ্চ ন্যায়ালয়ে এটা গুৰুত্বপূৰ্ণ গোচৰৰ শুনানি গ্ৰহণ কৰি এই মন্তব্য প্ৰদান কৰে।
বাংলাদেশৰ পৰা অবৈধভাৱে ভাৰতত প্ৰৱেশ কৰা এজন লোকৰ জামিন আবেদন নাকচ কৰি এই মন্তব্য কৰে বোম্বে উচ্চ ন্যায়ালয়ে।
জামিন আবেদন দাখিল কৰা ব্যক্তিজনৰ বিৰুদ্ধে জাল আৰু ভুৱা নথি-পত্ৰৰ ভিত্তিত ভাৰতত এটা দশকৰো অধিক সময় থকাৰ অভিযোগ।
ন্যায়াধীশ অমিত বোৰকাৰৰ বিচাৰপীঠে কয় যে নাগৰিকত্ব আইনৰ বিধানে কোনে ভাৰতৰ নাগৰিক হ’ব পাৰে আৰু কেনেকৈ নাগৰিকত্ব লাভ কৰিব পাৰে সেইটো নিৰ্ধাৰণ কৰে আৰু আধাৰ কাৰ্ড, পান কাৰ্ড, ভোটাৰ আইডি কাৰ্ডৰ দৰে নথি-পত্ৰ কেৱল চিনাক্তকৰণৰ বাবে বা সেৱা লাভৰ বাবেহে।
অভিযুক্ত বাংলাদেশী নাগৰিক বাবু আব্দুল ৰৌফ চৰ্দাৰক জামিন প্ৰদান কৰিবলৈ অস্বীকাৰ কৰে আদালতে। এই ব্যক্তিজনে বৈধ পাছপ’ৰ্ট বা ভ্ৰমণ নথি-পত্ৰ অবিহনে অবৈধভাৱে ভাৰতত প্ৰৱেশ কৰিছিল। অ
অভিযোগ অনুসৰি বাংলদেশৰ পৰা অবৈধভাৱে ভাৰতত প্ৰৱেশ কৰা এই লোকজনে আধাৰ কাৰ্ড, পান কাৰ্ড, ভোটাৰ আইডি, ভাৰতীয় পাছপ’ৰ্ট আদি নথি-পত্ৰ জালিয়াতিৰে লাভ কৰিছিল।
উচ্চ ন্যায়ালয়ে কয় যে কেৱল আধাৰ কাৰ্ড, পান কাৰ্ড বা ভোটাৰ আইডি কাৰ্ডৰ দৰে নথি-পত্ৰ থাকিলেই এজন ব্যক্তি ভাৰতৰ নাগৰিক নহয়। এই নথিসমূহ চিনাক্তকৰণৰ বাবে বা সেৱা লাভৰ বাবে, কিন্তু ইয়াৰ দ্বাৰা নাগৰিকত্ব আইনত উল্লেখ কৰা নাগৰিকত্বৰ মৌলিক আইনী প্ৰয়োজনীয়তাসমূহ নাইকিয়া নহয়।
