শুকুৰবাৰে নামপল্লী আদালতৰ পৰা নিয়মীয়া জামিন লাভ কৰিছে দক্ষিণৰ জনপ্ৰিয় অভিনেতা আল্লু অৰ্জুনে। এই গোচৰটো সন্ধ্যা থিয়েটাৰত সংঘটিত হোৱা ঘটনাৰ সৈতে জড়িত। ৪ ডিচেম্বৰত যেতিয়া সন্ধ্যা থিয়েটাৰত অভিনেতাগৰাকীৰ ছবি পুষ্পা ২ ৰ প্ৰদৰ্শন চলি আছিল, তেতিয়া তাত একত্ৰিত অনুৰাগীৰ মাজত হোৱা ঠেলা-হেঁচাত এগৰাকী মহিলা নিহত হোৱাৰ লগতে এটা শিশু আহত হয়।
১৩ ডিচেম্বৰত চাৰি সপ্তাহৰ বাবে অন্তৱৰ্তীকালীন জামিন মঞ্জুৰ কৰাৰ সময়ত উচ্চ ন্যায়ালয়ে আল্লু অৰ্জুনক নিয়মীয়া জামিনৰ বাবে ট্ৰায়েল ক’ৰ্টৰ কাষ চাপিবলৈ কৈছিল।
যোৱা ৪ ডিচেম্বৰত সন্ধ্যা থিয়েটাৰত ‘পুষ্পা ২: দ্য ৰুল’ৰ প্ৰিমিয়াৰ শ্ব’ৰ সময়ত সংঘটিত হোৱা ভয়াবহতাৰ সৈতে জড়িত গোচৰত ১৩ ডিচেম্বৰত আল্লু অৰ্জুনক গ্ৰেপ্তাৰ কৰা হৈছিল। ইয়াৰ পিছত নামপল্লী আদালতত হাজিৰ কৰোৱাত অভিনেতাজনক ১৪ দিনৰ বাবে ন্যায়িক জিম্মালৈ প্ৰেৰণ কৰা হয়।
এই ঠেলা-হেঁচাৰ পিছদিনা আৰক্ষীয়ে চিনেমা হল পৰিচালনা, আল্লু অৰ্জুন আৰু তেওঁৰ দলৰ বিৰুদ্ধে দোষী হত্যাৰ গোচৰ ৰুজু কৰে। তদন্তৰ অংশ হিচাপে ২৪ ডিচেম্বৰত আৰক্ষীয়ে আল্লু অৰ্জুনক জেৰা কৰিছিল। ঘটনাৰ চিচিটিভি ফুটেজ সংগ্ৰহ কৰাৰ পিছত আৰক্ষীয়ে প্ৰস্তুত কৰা ১০ মিনিটৰ ভিডিঅ’ৰ ভিত্তিত চিক্কাডপল্লী থানাত তিনি ঘণ্টাৰো অধিক সময় জেৰা কৰে।
