ভাৰতৰ ওপৰত ২৫ শতাংশ শুল্ক আৰোপ কৰাৰ কথা ঘোষণা কৰিছে আমেৰিকাৰ ৰাষ্ট্ৰপতি ড’নাল্ড ট্ৰাম্পে। এই কথা তেওঁ নিজৰ ছ’চিয়েল মিডিয়া প্লেটফৰ্ম ট্ৰুথৰ জৰিয়তে ঘোষণা কৰে। এই শুল্ক ১ আগষ্টৰ পৰা কাৰ্যকৰী হ’ব।
আমেৰিকা আৰু ভাৰতে বাণিজ্য চুক্তিৰ বাবে আলোচনা কৰি থকাৰ সময়তে ট্ৰাম্পে শুল্ক আৰোপ কৰাৰ এই ঘোষণাই দুয়োখন দেশৰ মাজৰ সম্পৰ্কত বিৰূপ প্ৰভাৱ পেলোৱাৰ সম্ভাৱনা প্ৰকট হৈ উঠিছে।
উল্লেখ্য যে, ইতিমধ্যে ড’নাল্ড ট্ৰাম্পে মঙলবাৰে ভাৰতৰ ওপৰত শুল্ক আৰোপ কৰাৰ ইংগিত প্ৰদান কৰিছিল। মঙলবাৰে এজন সাংবাদিকে সোধা প্ৰশ্নৰ উত্তৰত ট্ৰাম্পে কয়, ‘হয়, মই ভাবো। ভাৰত মোৰ বন্ধু। মোৰ অনুৰোধত তেওঁলোকে পাকিস্তানৰ সৈতে যুদ্ধ শেষ কৰিলে… ভাৰতৰ সৈতে হোৱা চুক্তি চূড়ান্ত হোৱা নাই। ভাৰত আমাৰ ভাল বন্ধু যদিও তেওঁলোকে মূলতঃ আন যিকোনো দেশতকৈ অধিক শুল্ক আৰোপ কৰিছে…’।
স্মৰ্তব্য যে ২০২৫ চনৰ জানুৱাৰী মাহত ড’নাল্ড ট্ৰাম্প দ্বিতীয়বাৰৰ বাবে আমেৰিকাৰ ৰাষ্ট্ৰপতি হোৱাৰ পিছৰে পৰা বিশ্বত আৰম্ভ হৈছে বাণিজ্য যুদ্ধ।
শেহতীয়াকৈ ট্ৰাম্পেও কৈছিল যে ভাৰতৰ সৈতে বাণিজ্যিক চুক্তি হ’ব আৰু ইয়াৰ দ্বাৰা ভাৰতৰ বজাৰ মুকলি হ’ব।
