আকৌ এবাৰ আমেৰিকাত বিমান দুৰ্ঘটনা সংঘটিত হৈছে। উত্তৰ এৰিজোনাত দুৰ্ঘটনাগ্ৰস্ত হৈছে এখন চিকিৎসা পৰিবহণ বিমান। দুৰ্ঘটনাটোৰ পিছতে বিমানখনত অগ্নিকাণ্ড সংঘটিত হয় আৰু ৪জন লোকৰো প্ৰাণহানি হয়।
নিউ মেক্সিকোৰ আলবাকুৱেৰ্কত ভিত্তি কৰি চি এছ আই এভিয়েশন কোম্পানীৰ এই বিমানখন ফ্লেগষ্টাফৰ পৰা প্ৰায় ২০০ মাইল (৩২১ কিলোমিটাৰ) উত্তৰ-পূবে চিনলে বিমানবন্দৰৰ ওচৰত দুৰ্ঘটনাগ্ৰস্ত হয়। বিমানখনত থকা লোকসকল আছিল চিকিৎসা কৰ্মী যিসকলে এজন ৰোগীক নিবলৈ চিকিৎসালয়লৈ গৈ আছিল।
ফেডাৰেল এভিয়েশন এডমিনিষ্ট্ৰেচনৰ বিষয়াসকলে জনোৱা মতে, বিয়লি বিমানবন্দৰত অৱতৰণ কৰাৰ সময়তে বিচক্ৰাফ্ট ৩০০ বিমানখন দুৰ্ঘটনাগ্ৰস্ত হয়। ৰাষ্ট্ৰীয় পৰিবহণ সুৰক্ষা ব’ৰ্ড আৰু এফ এ এয়ে ইয়াৰ তদন্ত কৰি আছে। দুৰ্ঘটনাৰ কাৰণ এতিয়াও জানিব পৰা হোৱা নাই।
উল্লেখ্য যে, চলিত বৰ্ষৰ জানুৱাৰী মাহৰ আৰম্ভণিতে ফিলাডেলফিয়াত এখন চিকিৎসা পৰিবহণ বিমান দুৰ্ঘটনাগ্ৰস্ত হৈছিল, য’ত ৮জন লোকৰ মৃত্যু হৈছিল। দুৰ্ঘটনাটোৰ তদন্ত কৰি থকা ৰাষ্ট্ৰীয় পৰিবহণ সুৰক্ষা ব’ৰ্ডে বিমানখনৰ ভইচ ৰেকৰ্ডাৰ কাম নকৰা বুলি জানিবলৈ দিয়ে।
শেহতীয়াকৈ আমেৰিকাৰ নৰ্থ কেৰ’লিনাৰ অক দ্বীপৰ সমীপত এখন বিমান সাগৰত খুন্দা মাৰে। দ্বীপটোৰ পাৰত মানুহে খোজ কাঢ়ি গৈ থকা অৱস্থাত সংঘটিত হয় এই দুৰ্ঘটনা। ২০২৫ চনৰ ২ আগষ্ট শনিবাৰে সন্ধিয়া সংঘটিত হয় এই দুৰ্ঘটনা।
