দেশৰ অন্যতম ধনাঢ্য ব্যক্তি মুকেশ আম্বানীৰ পুত্ৰ অনন্ত আম্বানী পুনৰ এবাৰ চৰ্চাত। জামনগৰৰ পৰা দ্বাৰকালৈ ১৪০ কিলোমিটাৰ পদযাত্ৰাৰ বাবে এইবাৰ চৰ্চাত অনন্ত আম্বানী। এই পদযাত্ৰাৰ সময়ত এনে এক খবৰ পোহৰলৈ আহিছে যাক লৈ এতিয়া দেশজুৰি তীব্ৰ কৌতুহলৰ সৃষ্টি হৈছে।
জানিব পৰা মতে, পদযাত্ৰাৰ সময়ত অনন্ত আম্বানীয়ে প্ৰায় ২৫০টা মূৰ্গী দুগুন দামত ক্ৰয় কৰিছে। জানো আহক এই খবৰৰ সবিশেষ…
উল্লেখ্য যে, পদযাত্ৰাৰ সময়ত অনন্ত আম্বানীয়ে প্ৰত্যক্ষ কৰিছিল যে প্ৰায় ২৫০ মূৰ্গী লৈ বুচড়খানা দিশে গৈ আছিল এখন ট্ৰাক। তেওঁ লগে লগে ট্ৰাকখন ৰখাই আৰু চালকৰ সৈতে কথা পাতি দুগুন দামত গোটেইখিনি মূৰ্গী ক্ৰয় কৰি লয়। তাৰ পিছত তেওঁ কৈছে যে এই সকলোবোৰ মূৰ্গী মই পালন কৰিম।
সম্প্ৰতি ছ’চিয়েল মিডিয়াত ভাইৰেল হোৱা এটা ভিডিঅ’ত দেখা যায় যে অনন্ত আম্বানীয়ে এটা মূৰ্গী হাতত লৈ খোজ কাঢ়ি আছে আৰু ‘জয় দ্বাৰকাধীশ’ ধ্বনি দিয়াও শুনা যায়।
অনন্ত আম্বানীয়ে যোৱা ২৮ মাৰ্চত জামনগৰৰ মোতী খাৱড়ীৰ পৰা যাত্ৰা আৰম্ভ কৰিছিল। অনন্ত আম্বানীয়ে ১০ এপ্ৰিলত দ্বাৰকাত ৩০ বছৰীয়া জন্মদিন পালন কৰিব। সৰ্বসাধাৰণ লোকসকল যাতে অসুবিধাৰ সন্মুখীন নহয় তাৰ বাবে নিশা যাত্ৰা কৰি আছে।
সংবাদ মাধ্যমৰ সৈতে হোৱা এক সাক্ষাৎকাৰত অনন্তই কয়, ‘যিকোনো কাম আৰম্ভ কৰাৰ আগতে মই সদায় ভগৱান দ্বাৰকাধীশক মনত পেলাওঁ। যুৱক-যুৱতীসকললৈ মোৰ বাৰ্তা হৈছে ঈশ্বৰৰ ওপৰত বিশ্বাস ৰাখক, কাৰণ য’ত ঈশ্বৰ আছে তাত চিন্তাৰ কোনো কথা নাই।’
