বিশ্বৰ অন্যতম শ্ৰেষ্ঠ সংগীত পৰিচালক এ আৰ ৰহমানক চেন্নাইৰ এখন ব্যক্তিগত হাস্পতালত ভৰ্তি কৰোৱা হৈছে। প্ৰাৰম্ভিক তথ্য অনুসৰি, বুকু আৰু ডিঙিত বিষ অনুভৱ কৰাৰ পিছতে সংগীত পৰিচালকগৰাকীক ততাতয়াকৈ হাস্পতালত ভৰ্তি কৰোৱা হৈছিল। প্ৰথমে তেওঁক বিভিন্ন টেষ্ট কৰোৱাৰ খবৰ আহিছিল যদিও শেহতীয়াকৈ তেওঁৰ স্বাস্থ্য সন্দৰ্ভত অধিক তথ্য প্ৰদান কৰিছে তেওঁৰ পুত্ৰই।
আজি ৰাতিপুৱা ৭.৩০ বজাত ভৰ্তি কৰোৱা হয় সংগীত পৰিচালকগৰাকীক। এ আৰ ৰহমানৰ ঘনিষ্ঠ সূত্ৰই জানিব দিয়া অনুসৰি, শনিবাৰে লণ্ডনৰ পৰা উভতি অহাৰ পিছতে এ আৰ ৰহমানে গেছ আৰু ডিহাইড্ৰেচনত ভুগিছিল। সেয়ে তেওঁ চেকআপৰ বাবে হাস্পতাললৈ যায়। এতিয়া তেওঁ সম্পূৰ্ণ সুস্থ।
ইফালে এ আৰ ৰহমানৰ পুত্ৰ আমিনে ইনষ্টাগ্ৰাম ষ্ট’ৰীত পোষ্ট কৰি শিল্পীগৰাকীৰ স্বাস্থ্যৰ আপডেট প্ৰদান কৰিছে। তেওঁ লিখিছে- ‘আমাৰ সকলো প্ৰিয় অনুৰাগী, পৰিয়াল আৰু শুভাকাংক্ষীলৈ আপোনালোকৰ মৰম, প্ৰাৰ্থনা আৰু সহায়ৰ বাবে আন্তৰিক ধন্যবাদ। দেউতাই ডিহাইড্ৰেচনৰ বাবে অলপ দুৰ্বল অনুভৱ কৰিছিল গতিকে আমি কিছুমান নিয়মীয়া পৰীক্ষা কৰি ললোঁ। কিন্তু মই আপোনালোকক ক’বলৈ পাই সুখী যে তেওঁৰ অৱস্থা এতিয়া ঠিকেই আছে। আপোনালোকৰ মৰম আৰু আশীৰ্বাদ আমাৰ বাবে বহুত গুৰুত্বপূৰ্ণ।’
ইফালে তামিলনাডুৰ মুখ্যমন্ত্ৰী এম কে ষ্টেলিনে চিকিৎসকৰ সৈতে কথা পাতি শিল্পীজনৰ স্বাস্থ্যৰ বুজ লয়। এক্সত তেওঁ লিখিছে, ‘এ আৰ ৰহমান অসুস্থ বুলি জানিব পৰা লগে লগে চিকিসকৰ সৈতে কথা পাতি তেওঁৰ স্বাস্থ্যৰ বুজ লও। তেওঁলোকে কৈছে তেওঁ সম্পূৰ্ণ সুস্থ আৰু শীঘ্ৰে ঘৰলৈ উভতিব।’
