বিগত কিছুদিনৰ পৰা হৈ থকা নেৰানেপেৰা বৰষুণৰ ফলত চুবুৰীয়া ৰাজ্য অৰুণাচল প্ৰদেশৰ দুটা ভিন্ন প্ৰান্তত হোৱা ভূমিস্খলনত গৰ্ভৱতী মহিলা-শিশুসহ কমেও ৯ জন লোকৰ মৃত্যু হোৱাৰ খবৰ আহিছে।
ইষ্ট কামেং জিলাত বৃহস্পতিবাৰে নিশা ১৩ নং ৰাষ্ট্ৰীয় ঘাইপথৰ বানা-চেপ্পা অঞ্চলত হোৱা ভূমিস্খলনৰ কৱলত পৰে এখন বাহন। ইয়াৰ ফলত বাহনখনত থকা সাতজন লোকৰ মৃত্যু হয়। শুকুৰবাৰে পুৱাই উদ্ধাৰকাৰী দলে সাতজনৰ মৃতদেহ উদ্ধাৰ কৰে বুলি বিষয়াসকলে জনায়।
এই ভূমিস্খলনত কৰুণ মৃত্যু হোৱা লোকসকলৰ আত্মাৰ শান্তি কামনা কৰি মৃত লোকসকলৰ পৰিয়াললৈ এককালীন আৰ্থিক সাহায্য প্ৰদানৰ কথাও ঘোষণা কৰে।
দ্বিতীয়টো ভূমিস্খলন নামনি সোৱনশিৰি জিলাৰ জিৰ’-কামলে পথত সংঘটিত হয়। এই ঘটনাটোত দুজন শ্ৰমিকৰ মৃত্যু হোৱাৰ লগতে আন দুজনৰ কথমপি প্ৰাণ ৰক্ষা পৰে।
ইফালে নেৰানেপেৰা বৰষুণৰ ফলত উজনি সোৱনশিৰি জিলাত বানে লৈছে ভয়ংকৰ ৰূপ। প্ৰায় ১০০টা পৰিয়াল বানৰ কৱলত পৰা বুলি প্ৰশাসনৰ তৰফৰ পৰা জনোৱা হৈছে।
