অসমৰ অন্যতম সন্মানীয় জাতীয় সংগঠন অসম সাহিত্য সভা মানেই যেন এতিয়া বিতৰ্ক। বিভিন্ন বিতৰ্কৰ মাজেৰে অনুষ্ঠিত হৈ যোৱা অসম সাহিত্য সভাৰ নিৰ্বাচনৰ আজি ঘোষণা হ’ব ফলাফল। ফলাফল ঘোষণাৰ দিনাও বিতৰ্কত নাম সাঙোৰ খাইছে সাহিত্য সভাৰ।
উল্লেখ্য যে আজি কামৰূপ জিলাৰ দদৰাৰ ভৃগু কুমাৰ ফুকন প্ৰেক্ষাগৃহত আয়োজন কৰা কাৰ্য নিৰ্বাহক বৈঠকত অনুষ্ঠিত হ’ব ভোট গণনা পৰ্ব। ফলাফল ঘোষণাৰ আগমুহূৰ্তত সভাত সৃষ্টি হৈছে উত্তপ্ত পৰিস্থিতি।
ফলাফলৰ পূৰ্বে অসম সাহিত্য সভাৰ প্ৰধান সম্পাদকৰ প্ৰাৰ্থীয়ে এগৰাকী কাৰ্য নিৰ্বাহক সদস্যক প্ৰহাৰ কৰাৰ গুৰুতৰ অভিযোগ উত্থাপন হৈছে। অজিত প্ৰসাদ শৰ্মা নামৰ প্ৰধান সম্পাদক পদৰ প্ৰাৰ্থীগৰাকীৰ বিৰুদ্ধে উত্থাপন হৈছে এই অভিযোগ।
উল্লেখ্য যে, নিমন্ত্ৰণী পত্ৰ নোপোৱাৰ বাবে কাৰ্য নিৰ্বাহক সদস্য সুশীল চন্দ্ৰ ডেকাই প্ৰশ্ন কৰিছিল উপেন্দ্ৰ জিৎ শৰ্মাক। এই কথাত ক্ষুন্ন হৈ কাৰ্য নিৰ্বাহকৰ আদৰণি সমিতিৰ দায়িত্বত থকা অজিত প্ৰসাদ শৰ্মাই প্ৰহাৰ কৰে লোকজনক।
স্মৰ্তব্য যে, সভাপতি পদক লৈ চলা বিতৰ্কৰ পিছতে অসম সাহিত্য সভাৰ উচ্চ ক্ষমতা সম্পন্ন সমিতিৰ বৈঠকত সভাপতি পদৰ বাবে ৰাজ্যৰ ৫গৰাকী বিশিষ্ট সাহিত্যিকৰ এখন প্ৰাৰ্থীৰ তালিকা চূড়ান্ত কৰিছিল। এই তালিকাত নাম থকা ড০ ভীমকান্ত বৰুৱা, অনুৰাধা শৰ্মা পূজাৰী আৰু ড০ গোবিন্দ প্ৰসাদ শৰ্মাই সভাপতি পদত প্ৰতিদ্বন্দ্বিতা নকৰাৰ কথা উল্লেখ কৰি নাম প্ৰত্যাহাৰ কৰিছিল।
ইয়াৰ পিছত তালিকাত নাম থকা অন্য দুজন ক্ৰমে সাহিত্য জগতৰ অন্যতম মহীৰূহ বিশিষ্ট সাহিত্যিক ড০ বসন্ত কুমাৰ গোস্বামী আৰু বিশিষ্ট লোক সংস্কৃতিৰ গৱেষক পণ্ডিত তথা ভাষাবিদ ড৹ উপেন ৰাভা হাকাচামে প্ৰতিদ্বন্দ্বিতা কৰিছে।
আজি কিছু সময়ৰ পিছতেই স্পষ্ট হ’ব জাতীয় অনুষ্ঠান অসম সাহিত্য সভাৰ ২০২৫-২৭ বৰ্ষৰ বাবে সভাপতি পদত কোন অধিষ্ঠিত হ’ব।
