বিজ্ঞান প্ৰযুক্তিৰ দিনতো অন্ধ বিশ্বাসৰ কবলত এখন গাঁও।সোণৰ মূৰ্তিৰ লোভত প্ৰৱঞ্চকৰ জালত সোমাই পৰিছে গাঁওৱাসী।
বিলাসীপাৰাত সংঘটিত হৈছে এক চাঞ্চল্যকৰ ঘটনা।দীৰ্ঘদিনৰ পৰাই বিলাসীপাৰাৰ খুদিগাঁৱত এটি দুষ্ট চক্ৰৰ দলে ধৰ্মীয় আবেগ-অনুভূতি সৃষ্টি কৰি সহজ-সৰল দুখীয়া-নিচলা গাঁওৱাসীৰ পৰা লাখ লাখ টকা সংগ্ৰহ কৰাৰ অভিযোগ উত্থাপিত হৈছে।
খবৰ অনুসৰি, এই ঠগ-প্ৰৱঞ্চকৰ দলটোৱে নকল সোণৰ মূৰ্তি বনাই গাঁওৱাসীৰ ঘৰৰ পিছফালে গাঁত খান্দি গৃহস্থক অচিনাকি নম্বৰ পৰা ফোন কৰে। ফোন কৰি ঘৰৰ গৃহস্থক কয় যে, তেওঁলোকৰ ঘৰৰ পিছফালে এটি সোণৰ মূৰ্তি আছে।সেই মূৰ্তিটো কাকো নোকোৱাকৈ উঠাই আনি লগত ৰাখিলে জীৱনলৈ আহিব লাখে লাখে টকা।
পিছে এই মূৰ্তিৰ সন্ধান দিওঁতা প্ৰৱঞ্চকৰ দলটোক আগতিয়াকৈ দিব লাগে টকা।এই বিষয়ে কাৰোবাক জনালেই পৰিয়াল ধ্বংস হৈ যাব বুলি ভয় দেখুৱাইছিল প্ৰৱঞ্চকৰ দলটোৱে।
পিছে এশ গৰু মাৰিলে, বাঘৰো মৰণ বুলি এষাৰ কথা আছে। এইবাৰ অনুৰূপ ঘটনা সংঘটিত কৰি আৰক্ষীৰ জালত পৰে প্ৰৱঞ্চকৰ দলটো।মূৰ্তি উদ্ধাৰৰ বিনিময়ত দলটোৱে গৃহস্থৰ পৰা আগ ধন হিচাপে বিচাৰিছিল ৪ লাখ ৮০ হাজাৰ টকা। কিন্তু ধন দিয়াৰ পূৰ্বে গৃহস্থই অৱগত কৰে বিলাসীপাৰা আৰক্ষীক।
এই ধন সংগ্ৰহৰ সময়তেই আৰক্ষীৰ জালত পৰে এই দলটোৰ দুই প্ৰৱঞ্চক আব্দুল ৰচিদ আৰু ময়নাল খান। আৰক্ষীৰ তথ্য অনুসৰি, আব্দুল ৰচিদৰ ঘৰ অভয়াপুৰীৰ ইউছুফপুৰত আৰু ময়নাল খানৰ ঘৰ কোকৰাঝাৰ জিলাৰ বেদলাংমাৰীত বুলি জানিব পৰা গৈছে।
ঠক প্ৰৱঞ্চক দুজন পৰা তিনিখন নকল সোণৰ মুৰ্তিৰ লগতে এখন AS 15 AC 0299 নম্বৰ মেজিক আৰু এখন AS 16M 1660 নম্বৰৰ EECO মাৰুতি ভেন জব্দ কৰিবলৈ সক্ষম হয়। ইফালে আন দুজন অভিযুক্ত শহিদ আলী আৰু সাইজুদ্দিন আলী পলাই যাবলৈ সক্ষম হয়। ইতিমধ্যে মুল মাষ্টাৰ মাইণ্ড অভিযুক্ত শহিদ আলী আৰু সাইজুদ্দিন আলীক বিচাৰি আৰক্ষীয়ে অভিযান অব্যাহত ৰাখিছে বুলি জানিব পৰা গৈছে।
