এজন-দুজন নহয়, একেলগে বিয়াত বহিল তিনিচুকীয়াৰ ২৫৫ গৰাকীকৈ দৰা-কইনাই। এখন ৰভাৰ তলতেই ২৫৫ গৰাকী দৰা-কইনাই অগ্নিক সাক্ষী কৰি আৰম্ভ কৰিলে নতুন জীৱন।
চাৰিওফালে এক উদুলি-মুদুলি পৰিৱেশৰ সৃষ্টি হয়। বিয়া নামেৰে মুখৰিত হৈ পৰে ৰভাতলি।
তিনিচুকীয়াৰ ঐতিহাসিক শিৱধামৰ চৌহদত আয়োজন কৰা হয় ২৫৫ দম্পতীৰ এই সামূহিক বিবাহ অনুষ্ঠান।
উত্তৰ পূৰ্বাঞ্চলৰ লোক কল্যাণ সমিতি, জন কল্যাণ সংস্থান, জয়পুৰ আৰু তিনিচুকীয়া জিলা বিবাহ সমিতিৰ উদ্যোগত আয়োজন কৰা হয় এই বিবাহ অনুষ্ঠান।
সম্পূৰ্ণ বৈদিক ৰীতি-নীতিৰে সম্পন্ন কৰা হয় এই ২৫৫ গৰাকী দৰা-কইনাক বিবাহকাৰ্য।এই বিবাহ অনুষ্ঠান উপলক্ষে পুৱাৰ ভাগত দেৱী পুখুৰীৰ পৰা এক বিশাল কলহ যাত্ৰাৰে চহৰ পৰিভ্ৰমণ কৰাৰ পাছত মুখ্যস্থান শিৱধামত সমাপ্ত হয়।বিবাহ অনুষ্ঠানত উপস্থিত হয় কেইবা শতাধিক লোক। অঞ্চলটোৰ ৰাইজৰ উপস্থিতিয়ে ৰজনজনাই তুলে ৰভাতলি।
আচলতে বহু সময়ত আৰ্থিক অসুবিধাৰ বাবে বহু লোকে বিবাহৰ নীতি-নিয়ম পালন কৰিব নোৱাৰে। গতিকে তেনে লোকসকলৰ কথা চিন্তা কৰিয়েই এই সামূহিক বিবাহ অনুষ্ঠানৰ আয়োজন কৰা হয়৷
