টিংখাঙৰ ৰাজপথত নিশা সংঘটিত হৈছে এক চাঞ্চল্যকৰ ঘটনা। কেইবাখনো গাড়ী ৰখাই ডকাইতিৰ চেষ্টা দুৰ্বৃত্তৰ।
টিংখাং আৰক্ষী থানাৰ অন্তৰ্গত গেলা-দিচাং গাঁৱত দেওবাৰে নিশা সংঘটিত হয় এই ঘটনা। বামুণবাৰী- তিনিআলি চাহ বাগিচা সংযোগী গেলাদিচাং পথৰ ওপৰত এখন চেভ’লেট বিত বাহন আৰু এখন ৱেগনাৰ বাহনত ডকাইতিৰ চেষ্টা দুৰ্বৃত্তৰ।
কোনোমতে হাত সাৰি চেভ’লেট বিত বাহনখন বেক কৰি ওলাই আহে যদিও পিছৰ সময়ত এখন ৱেগনাৰ বাহন ৰখাই মুখত কাপোৰ পৰিহিত এজন দুৰ্বৃত্তই ধন দাবী কৰে। বাহনৰ গৰাকীয়ে ধন দিবলৈ মান্তি নোহোৱাত বাহনখনত থকা দুজন যাত্ৰীক হাতত থকা লাঠিৰে উপৰ্যুপৰি প্ৰহাৰ কৰে।
ৱেগনাৰ খনত এগৰাকী মহিলাসহ ৩গৰাকী যাত্ৰী আছিল। টিংখাঙৰ বামুণবাৰীৰ পৰা নাহৰকটীয়াৰ চাচনিলৈ গৈ আছিল এই বাহনখন। দুৰ্বৃত্তৰ প্ৰহাৰত আঘাতপ্ৰাপ্ত হয় বাহনখনত থকা ২জন পুৰুষ যাত্ৰী। ভুক্তভোগী লোক ২জনৰ চিঞৰ-বাখৰত ঘটনাস্থলীত উপস্থিত হয় কিছু স্থানীয় লোক। ইয়াৰ পিছতে সকলো দুৰ্বৃত্তই পলায়ন কৰে।
নিশাই ভুক্তভোগী লোককেইজনে টিংখাং আৰক্ষী থানাত ঘটনা সন্দৰ্ভত এজাহাৰ দাখিল কৰে। বৰ্তমানেও চাচনী আৰু টিংখাং আৰক্ষীয়ে এই ঘটনাৰ উচিত তদন্ত অব্যাহত ৰাখিছে। এই সমগ্ৰ ঘটনাটোৱে এতিয়া অঞ্চলজুৰি তীব্ৰ চাঞ্চল্যৰ সৃষ্টি কৰিছে।
