মঙলবাৰে অৰ্থাৎ ১৭ ডিচেম্বৰত অসমৰ মুখ্যমন্ত্ৰী ড০ হিমন্ত বিশ্ব শৰ্মাই ভূটানৰ ৰাষ্ট্ৰীয় দিৱসৰ কাৰ্যসূচীত অংশগ্ৰহণ কৰে। কাৰ্যসূচীত অংশগ্ৰহণ কৰি ভাৰত আৰু ভূটানে সহযোগিতা আগবাঢ়িছে বুলি মন্তব্য প্ৰকাশ কৰে মুখ্যমন্ত্ৰীগৰাকীয়ে।
উল্লেখ্য যে, এই ৰাষ্ট্ৰীয় দিৱস কাৰ্যসূচীত অংশগ্ৰহণ কৰিবলৈ ভূটানৰ ৰজাই আমন্ত্ৰণ জনাইছিল অসম মুখ্যমন্ত্ৰী শৰ্মাক। চাৰিদিনীয়া ভ্ৰমণসূচীৰে সোমবাৰে থিম্ফুত উপস্থিত হয় মুখ্যমন্ত্ৰী ড০ শৰ্মা।এই অনুষ্ঠানত তেওঁৰ সৈতে সহধর্মিণী ৰিণিকি ভূঞা শৰ্মাও উপস্থিত থাকে।
এই বিশেষ উদযাপনত বৃহৎ সংখ্যক আবাল-বৃদ্ধ-বনিতাই যোগদান কৰি ভূটানৰ সাংস্কৃতিক আৰু সামাজিক ঐতিহ্য প্ৰদৰ্শন কৰি অনুষ্ঠান অধিক উপভোগ্য কৰি তোলে৷ একবিংশ শতিকাত আমাৰ দুয়োখন ৰাষ্ট্ৰই অংশীদাৰী লক্ষ্য আৰু আকাংক্ষাৰে আগবাঢ়ি যোৱাৰ সন্ধিক্ষণত আয়োজিত এই বিশেষ দিনটোত পুনৰ দেশখনৰ জনসাধাৰণলৈ শুভেচ্ছা জ্ঞাপন কৰে অসমৰ মুখ্যমন্ত্ৰীয়ে।
ভূটানৰ প্ৰধানমন্ত্ৰী দাছো ছেৰিং টবগে’ সৈতে মুখ্যমন্ত্ৰী হিমন্ত বিশ্ব শৰ্মা আৰু তেওঁ পত্নী ৰিণিকি ভূঞা শৰ্মাই মধ্যাহ্ন ভোজনো কৰে। এই সময়ছোৱাত ভূটান আৰু অসমে কেনেদৰে পৰস্পৰৰ বিকাশ-উন্নয়নমূলক আকাংক্ষাৰ পৰিপূৰক হ’ব পাৰে, সেই সন্দৰ্ভত এক যথেষ্ট ফলপ্রসূ আলোচনা কৰা হয় বুলি সদৰী কৰে ড০ শৰ্মাই।
একে সময়তে ভূটানৰ প্ৰধানমন্ত্ৰী দাছো ছেৰিং টবগে’ আৰু তাছি ডোমাক অসমৰ বয়ন সামগ্ৰী উপহাৰ স্বৰূপে প্ৰদান কৰাৰ লগতে পৰম্পৰাগত পানীয়ক উপস্থাপন কৰাৰ কথাও সদৰী কৰিছে মুখ্যমন্ত্ৰী হিমন্ত বিশ্ব শৰ্মাই। ইফালে অসমৰ জনসাধাৰণৰ হৈ ভূটানৰ প্রধানমন্ত্রীক ২০২৫ চনৰ ফেব্ৰুৱাৰী মাহত অনুষ্ঠিত হ’বলগীয়া ‘এডভাণ্টেজ আছাম ২.০’ অংশগ্ৰহণৰ বাবে আমন্ত্ৰণ জনোই ড০ শৰ্মাই।
