কেতিয়াও নোহোৱা-নোপজা ঘটনাৰ সূত্রপাত ঘটে অসম বিধানসভাৰ মজিয়াত। সংবিধানৰ নামত শপত লোৱা বিধায়কৰ অভব্য আচৰণ দেখা গৈছে বিধানসভাত। শুকুৰবাৰে মৰিয়নি সমষ্টিৰ বিধায়ক ৰূপজ্যোতি কুৰ্মীয়ে বিৰোধী বিধায়ক অখিল গগৈ আৰু শ্বেৰমান আলীলৈ লৈছিল চোঁচা। এই ঘটনাক কেন্দ্ৰ কৰি উত্তাল হৈ উঠে অসম বিধানসভাৰ অধিৱেশন।
অসম বিধানসভাৰ ক্ৰমাৎ অৱনতি হৈ গৈ আছে সেয়াই আকৌ এবাৰ প্ৰমাণিত হ’ল। শুকুৰবাৰে সদনত শাসকীয় বিধায়ক ৰূপজ্যোতি কুৰ্মী আৰু বিৰোধী বিধায়ক অখিল গগৈৰ মাজত সৃষ্টি হোৱা নজিৰবিহীন বাকযুদ্ধই শালীনতাৰ সকলো সীমা চেৰাই গৈছে।
অসম বিধানসভাৰ বাজেট অধিৱেশনত শুকুৰবাৰে সদনত বক্তব্য আগবঢ়াই থাকেতেই হঠাতে খঙত সংযমহীন হৈ পৰে বিধায়ক ৰূপজ্যোতি কুৰ্মী।
“অখিল গগৈ মই আপোনাৰ ওচৰলৈ গৈ মাইক ভাঙি দিম… অই ফটুৱা… তহঁতে কিয় কথা ক’বি…!’—এয়া ৰাস্তাত আস্তিন কোঁচাই কাজিয়াত লিপ্ত হোৱা কোনোবা গুণ্ডাৰ সংলাপ নহয়। এয়া অসম বিধানসভাৰ মজিয়াত শাসকীয় এগৰাকী বিজেপি বিধায়কৰ আচৰণ আৰু তেওঁৰ ভাষা ৷
সততে বিভিন্ন আচৰণ-মন্তব্যৰে সংবাদ শিৰোনাম আৰু বিতৰ্কত থকা বিধায়ক ৰূপজ্যোতি কুৰ্মীয়ে শুকুৰবাৰে বিধানসভাৰ মজিয়াত এই আচৰণ দেখুৱায়। বিধানসভাৰ এই দৃশ্য দেখাৰ পিছত স্বাভাবিকতেই প্ৰশ্ন উঠে– এনেকৈয়ে বাৰু চলে নেকি অসম বিধানসভা?
অসম বিধানসভাৰ সন্মানীয় জন প্ৰতিনিধি একোজনৰ এই লজ্বাজনক কাণ্ড দেখা পোৱাৰ পিছতেই হতভম্ব হৈ উঠে দৰ্শকৰ আসনত থকা আমোলা-বিষয়াসকলো।
বিধায়ক ৰূপজ্যোতি কুৰ্মীৰ এনে আচৰণৰ বিৰুদ্ধে সৰৱ হৈ উঠে বহুতো দল-সংগঠন। যোৰহাটৰ লগতে বিধায়কজনৰ নিজা সমষ্টি মৰিয়নিত তেওঁৰ বিৰুদ্ধে প্ৰতিবাদী কাৰ্যসূচী ৰূপায়ন কৰা হয়।
ইতিমধ্য বিধায়ক ৰূপজ্যোতি কুৰ্মীয়ে সামজিক মাধ্যমযোগে তেওঁ কৰা আচৰণৰ বিৰুদ্ধে ক্ষমাপ্ৰাৰ্থী হৈছে যদিও ৰাজ্যিক বিজেপিৰ সভাপতি দিলীপ শইকীয়াই বিধায়ক ৰূপজ্যোতি কুৰ্মীৰ এনে অভব্য আচৰণৰ বিৰুদ্ধে জাৰি কৰে শ্ব’কজ জাননী।
ৰাজ্যিক সভাপতি দিলীপ শইকীয়াই এখন পত্ৰযোগে বিধায়ক ৰূপজ্যতি কুৰ্মীক অসমবাসীৰ ওচৰত ক্ষমা খুজিবলৈ নিৰ্দেশ প্ৰদান কৰে।
