বিদেশী বহিষ্কাৰ সন্দৰ্ভত অসম কেবিনেটে আজি এক ঐতিহাসিক সিদ্ধান্ত গ্ৰহণ কৰিছে। অসমৰ পৰা অনুপ্ৰৱেশকাৰীক বহিষ্কৰণৰ বাবে জিলা আয়ুক্ত আৰু জ্যেষ্ঠ আৰক্ষী অধীক্ষকক (এছ এছ পি) নিৰ্দেশনা দিবলৈ প্ৰব্ৰজন (অসমৰ পৰা বহিষ্কৰণ) আইন, ১৯৫০ৰ অধীনত এক এছ অ’ পি প্ৰস্তুত কৰাৰ বাবে অনুমোদন জনাইছে কেবিনেটে।
কেবিনেট বৈঠকৰ পিছত মুখ্যমন্ত্ৰী ড০ হিমন্ত বিশ্ব শৰ্মাই সংবাদমেলৰ জৰিয়তে জানিব দি কয়, ‘সৰ্বোচ্চ ন্যায়ালয়ৰ সাংবিধানিক ন্যায়ালয়ৰ সিদ্ধান্তৰ ওপৰত ভিত্তি কৰি অসমত প্ৰথমবাৰৰ বাবে ট্ৰিবিউনেলৰ ব্যৱস্থাটো বাইপাছ কৰা হৈছে। ইমিগ্ৰেণ্টছ এক্সপালছন ফ্ৰম আছাম এক্ট ১৯৫০ ব্যৱহাৰৰ বাবে সিদ্ধান্ত গ্ৰহণ কৰিছে। ইয়াৰ ফলত বাংলাদেশী চিনাক্তকৰণ প্ৰক্ৰিয়াটো অতি সহজ হৈ পৰিব।’
তেওঁ লগতে কয় যে যদি জিলা উপায়ুক্তই আৰক্ষী বা আন কোনো উৎসৰ পৰা এজন ব্যক্তি অনুপ্ৰৱেশকাৰী বুলি সন্দেহৰ তথ্য লাভ কৰে, তেনে পৰিস্থিতিত সেই ব্যক্তিজনক ১০ দিনৰ ভিতৰত তেওঁৰ নাগৰিকত্বৰ প্ৰমাণ দাখিল কৰিবলৈ নিৰ্দেশনা দিব।
এই নিৰ্দেশনাৰ পিছত সন্দেহজনক নাগৰিকজনে যদি উপযুক্ত নথি পত্ৰৰে ভাৰতীয় নাগৰিক বুলি প্ৰমাণ কৰিব নোৱাৰে তেন্তে সেই ব্যক্তিজনৰ বিৰুদ্ধে বিহিত ব্যৱস্থা গ্ৰহণ কৰি ২৪ ঘণ্টাৰ সময় দি জিলা আয়ুক্তই নিৰ্ধাৰণ কৰা পথ অনুসৰি বহিষ্ককৰণৰ নিৰ্দেশনা প্ৰদান কৰিব।
ইফালে এই এছ অ’ পিত স্পষ্টভাৱে উল্লেখ আছে যে অনুপ্ৰৱেশকাৰী যদি আন্তঃৰাষ্ট্ৰীয় সীমাৰ শূন্য ৰেখাৰ ওচৰত ধৰা পৰে বা ৰাজ্যত প্ৰৱেশৰ ১২ ঘণ্টাৰ ভিতৰত ধৰা পৰে, তেন্তে পৰৱৰ্তী কোনো প্ৰক্ৰিয়া অবিহনে তাৎক্ষণিকভাৱে ওভতাই পঠিওৱা হ’ব।
