আজি মুখ্যমন্ত্ৰী ড০ হিমন্ত বিশ্ব শৰ্মাৰ নেতৃত্বাধীন মন্ত্ৰীসভাত চাৰিজন নতুন মন্ত্ৰীয়ে শপত লোৱাৰ পিছতে অনুষ্ঠিত হয় এখন গুৰুত্বপূৰ্ণ কেবিনেট বৈঠক। মুখ্যমন্ত্ৰীৰ অধ্যক্ষতাত অনুষ্ঠিত হোৱা কেবিনেটত লোৱা হয় কেইবাটও ডাঙৰ সিদ্ধান্ত।
অসম চৰকাৰৰ কেবিনেটে লোৱা ডাঙৰ সিদ্ধান্তৰ ভিতৰত হৈছে মৃত কাৰাবন্দীসকলৰ নিকটাত্মীয়লৈ বিত্তীয় সমৰ্থন। কেবিনেটে অসমৰ কাৰাগাৰৰ কাৰাবন্দীসকলৰ অপ্ৰাকৃতিক মৃত্যুৰ বাবে মৃতকৰ নিকটাত্মীয়ক ক্ষতিপূৰণ পৰিশোধৰ নীতিত অনুমোদন জনাইছে। নিম্নলিখিত অনুসৰি এককালীন ক্ষতিপূৰণ প্ৰদান কৰা হ’ব।
কয়দীসকলৰ মাজত কাজিয়া হৈ মৃত্যু হ’লে ২ লাখ টকা, কাৰাগাৰৰ কৰ্মচাৰীৰ দ্বাৰা অত্যাচাৰ বা প্ৰহাৰত মৃত্যু হ’লে ৩ লাখ, কাৰাগাৰৰ কৰ্মচাৰীৰ দ্বাৰা কৰ্তব্যত অৱহেলাত মৃত্যু হ’লে ৪ লাখ টকা, চিকিৎসা বিষয়া/পেৰামেডিক্সৰ দ্বাৰা অৱহেলাত মৃত্যু হ’লে ৪ লাখ টকা আৰু বন্দীসকলৰ দ্বাৰা আত্মহনন কৰিলে আত্মীয়লৈ ৩ লাখ টকাৰ আৰ্থিক সাহায্য প্ৰদান কৰিব।
ইফালে চৰকাৰী ব্যৱস্থাক নাগৰিকসকলৰ অধিক কাষলৈ অনা আৰু বৰাক উপত্যকাৰ ন্যায়সংগত উন্নয়নৰ প্ৰয়াসৰ বাবে কেবিনেটে বৰাক উপত্যকা উন্নয়ন বিভাগ গঠনত অনুমোদন জনাইছে।
আনহাতে কৃষকসকলৰ উপাৰ্জন বৃদ্ধি কৰিবলৈ আৰু স্বচ্ছ বিকল্প ইন্ধনৰ দিশত গুৰুত্ব দি কেবিনেটে ৩ বছৰৰ বাবে ৩ শস্য আধাৰিত ইথানল প্ৰস্তুতকাৰী গোটক ইথানলৰ ২ টকা/লিটাৰ হাৰত উৎপাদন সংযোজিত উদগনিক অনুমোদন জনাইছে।
