বিগত কিছুদিন ধৰি বাংলাদেশ আৰু ভাৰতৰ সম্পৰ্কত বৃদ্ধি পাইছে উত্তেজনা। ইফালে বাংলাদেশে এনে এক সিদ্ধান্ত গ্ৰহণ কৰিছে, যাৰ বাবে ভাৰতৰ উত্তৰ-পূৱৰ ৰাজ্যসমূহত মোবাইল ইণ্টাৰনেট সংযোগ বিঘ্নিত হ’ব পাৰে।
বাংলাদেশৰ ইউনুছ চৰকাৰে ভাৰতৰ সৈতে বেণ্ডউইডথ ট্ৰেনজিটৰ সুবিধা সন্দৰ্ভত বাতিল কৰিছে স্বাক্ষৰ কৰা চুক্তি।
বাংলাদেশৰ ইণ্টাৰনেট নিয়ন্ত্ৰকে ভাৰতৰ উত্তৰ-পূবৰ ৰাজ্যসমূহক বেণ্ডউইডথ যোগান ধৰাৰ বাবে ট্ৰেনজিট পইণ্ট হিচাপে কাম কৰাৰ পৰিকল্পনা বাতিল কৰে, এনে কৰাৰ ফলত ভাৰতৰ আঞ্চলিক ইণ্টাৰনেট হাব হোৱাৰ ক্ষমতাত বাধাৰ সৃষ্টি হ’ব পাৰে বুলি ধাৰণা কৰিছে বাংলাদেশে।
দুবছৰ পূৰ্বে বাংলাদেশৰ প্ৰাক্তন প্ৰধানমন্ত্ৰী শ্বেখ হাছিনাই ক্ষমতাত থকাৰ সময়ত ভাৰতী এয়াৰটেলৰ লগতে বাংলাদেশৰ ছিট কমিউনিকেচন আৰু ফাইবাৰ এট হোম আদি কোম্পানীয়ে বিটিআৰচি (বাংলাদেশ টেলিকমিউনিকেচন ৰেগুলেটৰী কমিছন)ৰ ওচৰত এই প্ৰস্তাৱ দাখিল কৰিছিল।
ভাৰতে উত্তৰ-পূৰ্বাঞ্চলৰ ৰাজ্যসমূহৰ বাবে বাংলাদেশৰ পৰা ইণ্টাৰনেটৰ দাবী কৰিছিল। ইয়াৰ অধীনত ভাৰত-বাংলাদেশ সীমান্তত ইণ্টাৰনেট চাৰ্কিট স্থাপন কৰি ডাটা ট্ৰেন্সমিছনৰ বাবে ট্ৰেনজিট লিংক সৃষ্টি কৰিব লাগিছিল। এই কথাত শ্বেখ হাছিনাই বাংলাদেশত ক্ষমতাত থকাৰ সময়ত সহমতত উপনীত হৈছিল।
প্ৰতিবেদন অনুসৰি, বিটিআৰচিয়ে কয় যে ইয়াৰ পৰা সকলো সুবিধা কেৱল ভাৰতেহে পায়। কিন্তু এই সিদ্ধান্তৰ আঁৰৰ কাৰণ হ’ল- দুয়োখন দেশৰ মাজৰ ক্ৰমবৰ্ধমান উত্তেজনা। ছামিট কমিউনিকেশ্যন আৰু ফাইবাৰ এট হোমৰ দৰে কোম্পানীক শ্বেখ হাছিনাৰ আৱামি লীগ পাৰ্টিৰ ঘনিষ্ঠ বুলি গণ্য কৰা হয়।
ছামিট কমিউনিকেশ্যনৰ অধ্যক্ষ মহম্মদ ফৰিদ খান আৱামী লীগৰ জ্যেষ্ঠ নেতা তথা সাংসদ ফাৰুক খানৰ কনিষ্ঠ ভাতৃ। এই কোম্পানীসমূহৰ প্ৰভাৱ হ্ৰাস কৰি নিজৰ স্থিতি শক্তিশালী কৰাৰ বাবেই ইউনুছ চৰকাৰে এই সিদ্ধান্ত গ্ৰহণ কৰিছে। ইউনুছ চৰকাৰৰ এই সিদ্ধান্তই ভাৰত আৰু বাংলাদেশৰ দ্বিপাক্ষিক সম্পৰ্কত যথেষ্ট প্ৰভাৱ পেলাব পাৰে ধাৰণা কৰা হৈছে।
