বাংলাদেশৰ কাৰাগাৰত বন্দী হিন্দু সাধু চিন্ময় কৃষ্ণ দাসৰ আজি অৰ্থাৎ ২ জানুৱাৰী জামিনৰ শুনানি হ’ব। তেওঁৰ জামিনৰ শুনানি চট্টগ্ৰাম মহানগৰ অধিবেশন ন্যায়াধীশৰ আদালতত হ’ব যদিও চিন্ময় কৃষ্ণ দাসৰ অধিবক্তা ৰবীন্দ্ৰ ঘোষ কলকাতাৰ বৰ্তমানেও এছ এছ কে এম হাস্পতালত ভৰ্তি হৈ আছে।
হাস্পতালত ভৰ্তি হৈ থকা কাৰণেই তেওঁৰ উপস্থিতিৰ সম্ভাৱনা অতি কম। ইফালে, ইণ্টাৰনেশ্যনেল ছ’চাইটি ফৰ কৃষ্ণ চেতনা চমুকৈ ইস্ককন’ৰ কলকাতাৰ মুখপাত্ৰ ৰাধাৰমণ দাসে ন্যায়ৰ আশা প্ৰকাশ কৰিছে।
উল্লেখ্য যে, যোৱা ২৭ নৱেম্বৰত ঢাকা আৰক্ষীয়ে ঢাকাৰ পৰা চট্টগংলৈ যোৱাৰ সময়ত শ্বাহজলাল বিমানবন্দৰৰ পৰা চিন্ময় কৃষ্ণ দাসক গ্ৰেপ্তাৰ কৰিছিল। পিছদিনা চট্টগ্ৰাম আদালতত তেওঁৰ গোচৰৰ শুনানি সন্দৰ্ভত আদালত চৌহদত হুলস্থুলৰ সৃষ্টি হয়।
ইয়াৰ পূৰ্বে বাংলাদেশৰ কাৰাগাৰত বন্দী চিন্ময় কৃষ্ণ দাসৰ অধিবক্তা ৰবীন্দ্ৰ ঘোষক অসুস্থতাৰ বাবে চিকিৎসালয়ত ভৰ্তি কৰোৱা হয়। হাৰ্ট এটেকৰ বাবে কলকাতাৰ এছ এছ কে এম হাস্পতালত চিকিৎসাধীন হৈ আছে।
মঙলবাৰে সন্ধিয়া বুকুৰ বিষৰ বাবে অধিবক্তা চিন্ময় কৃষ্ণ দাসক হৃদৰোগ বিভাগত ভৰ্তি কৰোৱা হয়। শাৰীৰিক অসুস্থতাৰ বাবে ২ জানুৱাৰীত দেশদ্ৰোহৰ গোচৰত কাৰাবন্দী হৈ থকা চিন্ময় কৃষ্ণৰ শুনানিত চট্টগ্ৰাম আদালতত তেওঁ উপস্থিত থাকিব নোৱাৰিব।
নৱবৰ্ষৰ প্ৰথম দিনটোটেই ৰবীন্দ্ৰ ঘোষৰ শাৰীৰিক অৱস্থাৰ যথেষ্ট অৱনতি ঘটে। লগে লগে তেওঁক এছ এছ কে এম হাস্পতালত ভৰ্তি কৰোৱা হয়। জনা যায় যে, বৰ্তমান অধিবক্তাজনৰ শাৰীৰিক অৱস্থা কিছু সুস্থিৰ।
কিছু সপ্তাহ পূৰ্বে চিকিৎসাজনিত কাৰণত ভাৰতলৈ আহিছিল চিন্ময় কৃষ্ণ দাসৰ ২৮ বছৰীয়া অধিবক্তা ৰবীন্দ্ৰ ঘোষ। জ্যেষ্ঠ অধিবক্তাজনে ভাৰতলৈ আহি অভিযোগ কৰিলে যে চট্টগ্ৰাম আদালতত উপস্থিত থকা একাংশ অধিবক্তাৰ আচৰণ সন্ত্ৰাসবাদীৰ দৰেই! যাৰ বাবে তেওঁ আঘাতপ্ৰাপ্ত হ’বলগীয়া হয়। সেয়ে চিকিৎসাৰ বাবে কলকাতালৈ আহে।
আনহাতে, মুখপাত্ৰ ৰাধাৰমণ দাসে কয় যে, ইস্কন সন্ন্যাসীসকলে বাংলাদেশৰ হিন্দু আৰু অন্যান্য ধৰ্মীয় সংখ্যালঘুসকলৰ সুৰক্ষাৰ বাবে প্ৰাৰ্থনা কৰে। লগতে তেওঁ চিন্ময় কৃষ্ণ দাসে ন্যায় লাভ কৰিব বুলি আশা প্ৰকাশ কৰে।
