ছলমান খানৰ শ্ব’ বিগ বছৰ নতুন ছিজন আৰম্ভ হ’বলৈ ওলাইছে। এইবাৰ শ্ব’টো সময় আগতেই অৰ্থাৎ ২০২৫ চনৰ ২৪ আগষ্টৰ পৰা সম্প্ৰচাৰিত হ’ব জানিব পৰা গৈছে।
এইবাৰো টিভি, বলীউডৰ তাৰকা, ইউটিউবাৰ আৰু ছ’চিয়েল মিডিয়াৰ প্ৰভাৱশালীসকলৰ প্ৰৱেশৰ বিষয়ে আলোচনা হৈছে। একে সময়তে এক প্ৰতিবেদন অনুসৰি, এলভিছ যাদৱৰ কলেজীয়া সতীৰ্থ তথা পেহেলগাম সন্ত্ৰাসবাদী আক্ৰমণত শ্বহীদ হোৱা নৌসেনাৰ বিষয়াৰ পত্নী হিমাংশী নৰৱালৰ সৈতে এই অনুষ্ঠানৰ বাবে যোগাযোগ কৰা হৈছে।
এক প্ৰতিবেদন অনুসৰি, শ্ব’ মেকাৰসকলে হিমাংশীক এই শ্ব’টো আগবঢ়াইছে। সূত্ৰটোৰ মতে, নিৰ্মাতাসকলে এইবাৰ এনে কিছুমান মুখ বিচাৰে, যিবোৰে তৎক্ষণাত দৰ্শকৰ সৈতে সংযোগ স্থাপন কৰে। এই কাৰণতে হিমাংশী নাৰৱালক অন্তৰ্ভুক্ত কৰাৰ সন্দৰ্ভত তীব্ৰ খবৰ আহিছে। অৱশ্যে এই মুহূৰ্তত আনুষ্ঠানিকভাৱে নিশ্চিত হোৱা নাই।
উল্লেখ্য যে, ২০২৫ চনৰ ২২ এপ্ৰিলত কাশ্মীৰৰ পেহেলগামত সংঘটিত সন্ত্ৰাসবাদী আক্ৰমণত শ্বহীদ হোৱা হিমাংশীৰ স্বামী বিনয় নৰৱাল নৌসেনাৰ বিষয়া আছিল। ছ’চিয়েল মিডিয়াত ভাইৰেল হৈছিল হিমাংশীৰ ছবি য’ত স্বামীৰ মৃতদেহৰ ওচৰত বহি কান্দি আছিল। এতিয়া বিগ বছৰ নতুন ছিজনত হিমাংশী উপস্থিত হ’ব নে নাই চাবলৈ অপেক্ষা কৰা হৈছে।
এইবাৰ ৰাজনৈতিক টুইষ্ট লৈ আহিব ‘বিগ বছ’ৰ নতুন ছিজন। খোদ ট্ৰেইলাৰত ছলমান খানে ইংগিত দিছে যে, এইবাৰ প্ৰতিযোগীসকলে ঘৰতে সিদ্ধান্ত লোৱাৰ সম্পূৰ্ণ অধিকাৰ লাভ কৰিব। আমোদজনক কথাটো হ’ল ঘৰটোত মাত্ৰ ১৫খন বিচনা থাকিব আৰু সকলোবোৰ চিংগল হ’ব, অৰ্থাৎ ডাবল বেডৰ বিকল্প নাইকিয়া কৰা হৈছে। প্ৰতিযোগীৰ সংখ্যা বেছি আৰু বিচনা কম হোৱাৰ লগে লগে আৰম্ভণিৰে পৰাই সংঘাতৰ পৰিস্থিতিৰ সৃষ্টি হোৱাটো নিশ্চিত। ইয়াৰ উপৰিও মেকাৰসকলে এলভিছ যাদৱ আৰু হিনা খানৰ দৰে কিছুমান পুৰণি মুখ ঘূৰাই আনি শ্ব’টোত মছলা যোগ কৰিব পাৰে বুলিও হুলস্থুলীয়া পৰিৱেশৰ সৃষ্টি হৈছে।
