কামৰূপ জিলাৰ ৰঙিয়া মহকুমাৰ কঞা আৰক্ষী থানাৰ অন্তৰ্গত সৌৰামুৰীত সংঘটিত হয় এক চাঞ্চল্যকৰ ঘটনা।
সম্পত্তিৰ লোভত নিজৰেই ভগ্নীক হত্যা কৰে দিনেশ দাস নামৰ এগৰাকী ব্যক্তিয়ে। প্ৰায় ৪৫ বছৰীয়া মহিলাগৰাকীৰ মৃতদেহ উদ্ধাৰ হয় কঞা আৰক্ষী থানাৰ অন্তৰ্গত সৌৰামুৰী অঞ্চলত।
মহিলাগৰাকীৰ মৃতদেহ উদ্ধাৰক লৈ চাঞ্চল্যকৰ পৰিৱেশৰ সৃষ্টি সৌৰামুৰীত।
উল্লেখ্য যে, সৌৰামুৰীৰ নদী পাৰৰ দিনেশ দাসে নিজৰ বিবাহ বিচ্ছেদিত ভগ্নীক সম্পত্তিৰ লোভত মৰিয়াই হত্যা কৰি পানীত পেলাই দিয়াৰ গুৰুতৰ অভিযোগ স্হানীয় লোকৰ।
জানিবলৈ পৰা মতে বিবাহ বিচ্ছেদ হোৱাৰ পিছতেই মহিলা গৰাকীয়ে তেওঁৰ একমাত্ৰ পুত্ৰৰ সৈতে সৌৰামুৰী নদীপাৰত ককায়েকৰ লগত বাস কৰি আছিল যদিও বিগত দুবছৰ ধৰি ককায়েকৰ সৈতে তেওঁৰ মাটি বাৰী সংক্ৰান্তত হাই-কাজিয়া চলি আছিল।
যাৰ পৰিণতিত ককায়েক দিনেশ দাসে নিজ ভগ্নীক পিছ মুৰত কোৱাই হত্যা কৰি পানীত পেলাই দি পলায়ন কৰে। ইতিমধ্যে ঘটনাস্হলীত কঞা আৰক্ষী উপস্থিত হৈ মহিলাগৰাকীৰ মৃতদেহ মৰণোত্তৰ পৰীক্ষাৰ বাবে ব্যবস্থা গ্ৰহণ কৰাৰ লগতে ঘটনা সন্দৰ্ভত তদন্ত আৰম্ভ কৰিছে।
আনহাতে মাটি বাৰীৰ সংক্ৰান্তত নিজ বিবাহ বিচ্ছেদিত ভনীয়েকক ৰাতিপুৱাই হত্যা কৰি পলায়ন কৰা দিনেশ দাসক গ্ৰেপ্তাৰ কৰি নজিৰ বিহীন শাস্তি প্ৰদান কৰিবলৈ স্হানীয় ৰাইজে প্ৰশাসনক দাবী জনাইছে।
