২০২০ চনত স্বাক্ষৰিত বড়ো শান্তি চুক্তিৰ এতিয়াও ৰূপায়িত নোহোৱাকৈ থকা দফা সমূহ আগন্তুক ছমাহৰ ভিতৰত ৰূপায়ণ কৰাৰ দাবীৰে নতুন দিল্লীত কেন্দ্ৰীয় গৃহমন্ত্ৰী অমিত শ্বাহক সাক্ষাত কৰে নিখিল বড়ো ছাত্ৰ সন্থাৰ এটি সঁজাতি দলে।
মঙলবাৰে সন্ধিয়া ৫ বজাত গৃহমন্ত্ৰী অমিত শ্বাহৰ চৰকাৰী আবাসত সাক্ষাত কৰে সজাতি দলটোৱে। সজাতি দলটোক নেতৃত্ব দিয়ে এবছুৰ সভাপতি দীপেন বড়োৱে। সঁজাতি দলটোত এবছুৰ নেতৃবৰ্গৰ লগতে আছিল বিটিচি প্ৰধান প্ৰমোদ বড়ো আৰু সাংসদ ৰণগৌৰা নাৰ্জাৰীও।
উল্লেখ্য যে, সংসদৰ আগন্তক বৰ্ষাকালীন অধিৱেশনত বড়ো চুক্তি ৰূপায়ণৰ স্বাৰ্থত সংবিধানৰ ১২৫ নম্বৰ সংশোধনী বিধেয়ক গৃহীত কৰাৰ বাবে যাৱতীয় ব্যৱস্থা গ্ৰহণ কৰিবলৈ গৃহমন্ত্ৰী অমিত শ্বাহক আহ্বান জনায় সজাতি দলটোৱে।
ইয়াৰ উপৰি ৰূপায়ণ নোহোৱা অন্যান্য দফা সমূহ ৰূপায়ণৰ ক্ষেত্ৰতো ক্ষিপ্ৰ ব্যৱস্থা ল’বলৈ আহ্বান জনায় এবছু নেতৃত্বই।
