অগ্ৰগামী বিটিআৰৰ সংকল্পৰে বিজেপিৰ ওদাগুৰি জিলাই আয়োজন কৰা বিজয় সংকল্প সভাত অংশগ্ৰহণ কৰে মুখ্যমন্ত্ৰী ড০ হিমন্ত বিশ্ব শৰ্মাই। এই সভাত হাজাৰ হাজাৰ ৰাইজে মুখ্যমন্ত্ৰীক ফুলৰ মালা, গামোছা আদিৰে সম্বৰ্ধনা জনোৱাৰ লগতে উচ্ছেদ অভিযান অব্যাহত ৰাখিবলৈ মুখ্যমন্ত্ৰীক আহ্বান জনায়।
জিলাখনৰ ৰাইজে সমগ্ৰ অসমৰ লগত বিটিআৰৰ নিৰ্দিষ্ট কিছুমান স্থানতো উচ্ছেদৰ চলাবৰ বাবে অনুৰোধ কৰে বুলি জানিবলৈ দিয়ে বিজেপি, অসম প্ৰদেশৰ মুখপাত্ৰ ৰঞ্জীৱ কুমাৰ শৰ্মাই। লগতে তেওঁ কয় যে, ৰাজ্যখনৰ চৰকাৰী ভূমিৰ পৰা বেদখলকাৰীক উচ্ছেদ কৰাৰ বাবে চলি থকা অভিযান আইনী প্ৰক্ৰিয়াৰ পৰা সামাজিক আন্দোলনলৈ ৰূপান্তৰিত হৈছে। এক কথাত কবলৈ গলে বেদখলকাৰীক উচ্ছেদ কৰাৰ বাবে মুখ্যমন্ত্ৰী ড০ হিমন্ত বিশ্ব শৰ্মাই গ্ৰহণ কৰা বলিষ্ঠ পদক্ষেপক ৰাজ্যৰ সকলো থলুৱা খিলঞ্জীয়া ভূমিপুত্ৰই আঁদৰণি জনাইছে বুলি ৰঞ্জীৱ কুমাৰ শৰ্মাই জানিবলৈ দিয়ে।
উল্লেখ্য যে, বিটিআৰ নিৰ্বাচনৰ প্ৰতি লক্ষ্য ৰাখি বিজেপিয়ে বিটিআৰৰ অন্তৰ্ভূক্ত ৫খন জিলাত ২ আগষ্টৰ পৰা ‘বিজয় সংকল্প সভা’ আৰম্ভ কৰিছে। ঠিক একেদৰে কোকৰাঝাৰ জিলাৰ ১২টা পৰিষদীয় সমষ্টিত ৭,১২ আৰু ১৯ আগষ্টত ‘বিজয় সংকল্প সভা’ অনুষ্ঠিত হ’ব বুলি ৰাজ্যিক বিজেপি মুখপাত্ৰ গৰাকীয়ে জানিবলৈ দিয়ে।
