আজি অৰ্থাৎ ১৯ ফেব্ৰুৱাৰীত অসম বিধানসভা বাজেট অধিবেশন ২০২৫ ৰ দ্বিতীয়টো দিন৷ বাজেট অধিবেশনৰ কাৰ্যক্ৰমণিকা অনুসৰি পুৱা ৯:৩০ বজাত আৰম্ভ হয় এই অধিবেশন।
উল্লেখ্য যে, এইবাৰ প্ৰথমবাৰৰ বাবে কোকৰাঝাৰত অনুষ্ঠিত হয় অসম বিধানসভাৰ বাজেট অধিৱেশনৰ প্ৰথম দিনৰ কাৰ্যসূচী৷ ইয়াৰ পাচত এদিনীয়া বিৰতিৰ অন্তত আজিৰ পৰাৰ পুনৰ অসম বিধানসভাত বাকী অধিৱেশন অনুষ্ঠিত হয়।
এই সদনত উপস্থিত বিৰোধীকে ধৰি অসম চৰকাৰৰ বহু মন্ত্ৰী-বিধায়ক উপস্থিত থাকে। শাসকীয় বিজেপিয়ে APSC ৰ কেলেংকাৰীৰ সন্দৰ্ভত বিপ্লৱ কুমাৰ শৰ্মাৰ প্ৰতিবেদনৰ ওপৰত সভাস্থগিত প্ৰস্তাৱ আনি আলোচনাৰ দাবী তোলে সদনত।
১০ মিনিটৰ বাবে অসম বিধানসভাৰ বাজেট অধিৱেশনৰ পৰা অখিল গগৈক নিলম্বন কৰা হয়। গুৱাহাটীত জল-জীৱন আঁচনিৰ ৰূপায়নক লৈ প্ৰশ্ন উত্থাপন কৰিছিল অখিলে। ইয়াৰ উপৰি বিভাগীয় মন্ত্ৰীৰ সৈতে বাক-বিতণ্ডাৰ ফলত নিলম্বন কৰা হয় অখিল গগৈক।ইয়াৰ লগতে ঋণ লোৱাক লৈও মন্ত্ৰী পীষুষ হাজৰিকা আৰু অখিল গগৈৰ মাজত বাকযুদ্ধ হয়।
শাসক-বিৰোধীৰ হুলস্থূলৰ বাবে সদন স্থগিত ৰাখিবলগীয়া হয় অধ্যক্ষই। পুনৰ সদন আৰম্ভ হোৱাত পুনৰ সভা স্থগিত প্ৰস্তাৱৰ দাবী তোলে শাসক-বিৰোধীয়ে। এই হুলস্থূলীয়া পৰিৱেশৰ বাবে তিনিবাৰকৈ সদন স্থগিত ৰাখিবলগীয়া হয়। প্ৰথমবাৰ ১০ মিনিট, দ্বিতীয়বাৰ ১০ মিনিট আৰু তৃতীয়বাৰ ২০ মিনিটৰ বাবে স্থগিত হয় সদন।
সদনত উমৰাংচ’ কাণ্ডক লৈ চৰকাৰৰ ভূমিকাক উত্থাপন কৰা হয়। ইফালে চৰৰ জনতাৰ হৈ বিধানসভাত গৰজি উঠে এআইইউডিএফৰ বিধায়ক আমিনুল ইছলাম।
