সোমবাৰে অসম বিধানসভাৰ বাজেট অধিৱেশনত বিত্তমন্ত্ৰী অজন্তা নেওগে দাখিল কৰে ২০২৫-২৬ পূৰ্ণাংগ বাজেট। এই বাজেটত বিত্তমন্ত্ৰীয়ে কেইবাটাও ডাঙৰ ঘোষণা কৰে। বিশেষকৈ মহিলাসকলৰ বাবে এই বাজেটত বহু কেইটা সিদ্ধান্ত গ্ৰহণ কৰা হয়।
আজিৰ বাজেটত মহিলাৰ বাবে গ্ৰহণ কৰা ডাঙৰ সিদ্ধান্তকেইটা হ’ল-
- মুখ্যমন্ত্ৰীৰ নিযুত মইনা আঁচনি
এই আঁচনিৰ অধীনত প্রতিমাহে ১০ মাহৰ বাবে একাদশ শ্ৰেণীৰ ছাত্ৰীসকলক ১,০০০ টকা, স্নাতক প্রথম বৰ্ষৰ ছাত্ৰীসকলক ১,২৫০ টকা আৰু স্নাতকোত্তৰ তথা বি এডৰ প্ৰথম বৰ্ষৰ ছাত্ৰীসকলক ২,৫০০ টকাকৈ প্ৰদান কৰি স্ত্রী শিক্ষাক আগুৱাই নিয়া হ’ব।
- অৰুণোদয় ৩.০
মহিলাসবলীকৰণ আৰু অৰ্থনৈতিক অন্তৰ্ভুক্তিকৰণৰ বাবে চৰকাৰে লোৱা এক বিশেষ পদক্ষেপ হৈছে অৰুণোদয় আঁচনি। এই আঁচনিৰ অধীনত মাহিলী মহিলাসকলক ১,২৫০ টকাকৈ আগবঢ়োৱা হয়। ২০২৫-২৬ বিত্তীয় বৰ্ষত অসমত অৰুণোদয়ৰ হিতাধিকাৰীৰ সংখ্যা ৩৭.২ লাখলৈ বৃদ্ধিৰ লক্ষ্য চৰকাৰৰ।
- লাখপতি বাইদেউ, মহিলা আত্মসহায়ক গোট আৰু উদ্যমীৰ সবলীকৰণ
প্রতিশ্রুতিসম্পন্ন মহিলা নেতৃত্বাধীন ষ্টার্টআপক উৎসাহিত কৰাৰ বাবে প্রায় ২৫০ কোটি টকাৰে ‘লাখপতি বাইদেউ পুঁজি’ গঠনৰ কৰা হৈছে। এই আঁচনিৰ লক্ষ্য হৈছে মহিলা উদ্যমীৰ হকে এটা শক্তিশালী পৰিবেশতন্ত্র সৃষ্টি কৰি অৰ্থনৈতিক প্রগতি আৰু স্বনিৰ্ভৰশীলতা গঢ়ি তোলা।
- মুখ্যমন্ত্ৰীৰ মহিলা উদ্যমিতা অভিযান
মহিলা উদ্যমিতা অভিযান হৈছে আত্ম-সংস্থাপনমূলক আঁচনি। এই আঁচনিৰ দ্বাৰা গ্ৰামাঞ্চলৰ ৩০ লাখ মহিলা আৰু নগৰ অঞ্চলৰ ২ লাখ আত্মসহায়ক গোটৰ সদস্যক সামৰি লোৱা হ’ব।
