বাংলাদেশৰ অভিজ্ঞ বেটছমেন মাহমুদুল্লাই ১২ মাৰ্চত আন্তঃৰাষ্ট্ৰীয় ক্ৰিকেটৰ পৰা অৱসৰ লোৱাৰ কথা ঘোষণা কৰে। ২০২১ চনত টেষ্ট আৰু ২০২৪ চনত টি-২০ৰ পৰা অৱসৰ লোৱাৰ কথা ঘোষণা কৰা ৩৯ বছৰীয়া মাহমুদুল্লাই আন্তঃৰাষ্ট্ৰীয় ক্ৰিকেটৰ পৰা বিদায় দিবলৈ ছ’চিয়েল মিডিয়াত পোষ্ট কৰে।
ইয়াৰ পূৰ্বে মাহমুদুল্লাই ২০২৫ চনৰ ফেব্ৰুৱাৰী মাহৰ পিছত তেওঁক কেন্দ্ৰীয় চুক্তিৰ বাবে বিবেচনা নকৰিবলৈ ব’ৰ্ডক অনুৰোধ জনাইছিল। ছ’চিয়েল মিডিয়াৰ এটা পোষ্টত তেওঁ লিখিছে যে, তেওঁ আন্তঃৰাষ্ট্ৰীয় ক্ৰিকেটৰ পৰা অৱসৰ লোৱাৰ সিদ্ধান্ত লৈছে। তেওঁ লগতে নিজৰ সকলো সতীৰ্থ, প্ৰশিক্ষক আৰু বিশেষকৈ মোৰ অনুৰাগীক ধন্যবাদ জনাই, যিয়ে তেওঁক সদায় সহায় কৰি আহিছে।
এদিনীয়া ক্ৰিকেটত বাংলাদেশৰ হৈ চতুৰ্থ সৰ্বাধিক ৰান সংগ্ৰহকাৰী মাহমুদুল্লাই ৩৬.৪৬ গড়ে ৫৬৮৯ ৰান সংগ্ৰহ কৰে। ইয়াৰ উপৰিও তেওঁ ৪টা শতক অৰ্জন কৰিছে, এই সকলোবোৰ আইচিচি প্ৰতিযোগিতাত কৰা হৈছে।
২০১৫ চনৰ বিশ্বকাপত একেৰাহে দুটা শতক, ২০১৭ চনৰ চেম্পিয়নছ ট্ৰফীত নিউজিলেণ্ডৰ বিৰুদ্ধে এটা শতক আৰু ২০২৩ চনৰ এদিনীয়া বিশ্বকাপত দক্ষিণ আফ্ৰিকাৰ বিৰুদ্ধে চতুৰ্থ শতক অৰ্জন কৰিছিল।
মাহমুদুল্লাই ১৭ বছৰীয়া কেৰিয়াৰত ২৩৯খন এদিনীয়া, ৫০খন টেষ্ট আৰু ১৪১খন টি-২০ মেচ খেলিছিল। ২০০৭ চনত এদিনীয়াত অভিষেক ঘটা মাহমুদুল্লাই প্ৰথম অৱস্থাত লোয়াৰ অৰ্ডাৰ অল ৰাউণ্ডাৰ হিচাপে খেলিছিল। ২০১১ চনৰ বিশ্বকাপত তেওঁৰ জীৱনলৈ এটা টাৰ্নিং পইণ্ট আহিছিল, যেতিয়া তেওঁ ইংলেণ্ডৰ বিৰুদ্ধে বাংলাদেশক এক আচৰিত জয়ৰ দিশত আগুৱাই লৈ গৈছিল।
পিছলৈ তেওঁ এজন গুৰুত্বপূৰ্ণ মিডল অৰ্ডাৰ বেটছমেন হিচাপে পৰিগণিত হয় আৰু ২০১৭ চনৰ চেম্পিয়নছ ট্ৰফীত নিউজিলেণ্ডৰ বিৰুদ্ধে ছাকিব আল হাছানৰ সৈতে ২২৩ ৰানৰ ঐতিহাসিক অংশীদাৰিত্বকে ধৰি বহু স্মৰণীয় ইনিংছ খেলে।
মাহমুদুল্লাৰ অৱসৰৰ লগে লগে বাংলাদেশৰ সোণালী প্ৰজন্মৰ অন্ত পৰিব। তেওঁ এদিনীয়া বিশ্বকাপত তিনিটাকৈ শতক অৰ্জন কৰা একমাত্ৰ বাংলাদেশী বেটছমেন।
