টীম ইণ্ডিয়াৰ চেজ মাষ্টাৰ বিৰাট কোহলীক আৰু ৰঙা বল লৈ খেলা দেখা নাযাব। ১২ মে’ত আটাইতকৈ টেষ্ট ক্ৰিকেটৰ পৰা অৱসৰ গ্ৰহণ কৰে। এতিয়া বিৰাট কোহলীক কেৱল এদিনীয়া ক্ৰিকেটত দেখা যাব, কাৰণ তেওঁ টি-২০ বিশ্বকাপৰ পিছত এই ফৰ্মেটৰ পৰা অৱসৰ লৈছে।
কোহলীৰ অৱসৰৰ খবৰ পোৱাৰ পিছত এতিয়া বিৰাট কোহলীক লৈ ডাঙৰ ৰহস্য প্ৰকাশ হৈছে। আন্তঃৰাষ্ট্ৰীয় ক্ৰিকেটত কোহলীৰ অভিষেক সন্দৰ্ভত ডাঙৰ তথ্য প্ৰকাশ কৰিছে এগৰাকী প্ৰাক্তন নিৰ্বাচকে। এদিনীয়া ক্ৰিকেটত এজন প্ৰাক্তন খেলুৱৈৰ পৰামৰ্শমতে তেওঁক কেনেদৰে নিৰ্বাচিত কৰা হৈছিল সেই কথা তেওঁ জনায়।
টেষ্ট ক্ৰিকেটৰ পৰা টীম ইণ্ডিয়াৰ তাৰকা বেটছমেন বিৰাট কোহলীৰ অৱসৰ সন্দৰ্ভত ডাঙৰ কথা কৈছে প্ৰাক্তন ৰাষ্ট্ৰীয় নিৰ্বাচক সঞ্জয় জগদালে। তেওঁ কয় যে, কোহলীৰ এই সিদ্ধান্তক সন্মান কৰা উচিত। ২০০৮ চনৰ এটা কাণ্ডৰ কথা মনত পেলাই তেওঁ কয় যে, তেতিয়াৰ ৰাষ্ট্ৰীয় নিৰ্বাচক সমিতিৰ মুৰব্বী দিলীপ ভেংছাৰ্কাৰৰ জোৰত বিৰাট কোহলীক ভাৰতৰ এদিনীয়া দলত অন্তৰ্ভুক্ত কৰা হৈছিল যদিও তাৰ পিছত একাংশ লোকে নিৰ্বাচকসকলক সমালোচনা কৰিছিল যে কেনেকৈ এজন যুৱ খেলুৱৈক আন্তঃৰাষ্ট্ৰীয় ভ্ৰমণলৈ পঠিওৱা হৈছিল।
উল্লেখ্য যে, অষ্ট্ৰেলিয়াত খেলা ইমাৰ্জিং প্লেয়াৰ্ছ টুৰ্ণামেণ্টত কোহলীয়ে প্ৰাক্তন ক্ৰিকেটাৰ দিলীপ ভেংছাৰকাৰক শতক অৰ্জন কৰি বহুখিনি আপ্লুত কৰিছিল। তেতিয়া ভেংছাৰকাৰ আছিল ৰাষ্ট্ৰীয় নিৰ্বাচকৰ পাঁচজনীয়া সমিতিৰ মুৰব্বী। আনহাতে সঞ্জয় জগদাল পাঁচজনীয়া সমিতিৰ সদস্য আছিল। দিলীপ ভেংছাৰ্কাৰৰ নিৰ্দেশতেই বিৰাট কোহলীয়ে ২০০৮ চনৰ ১৮ আগষ্টত শ্ৰীলংকাৰ বিৰুদ্ধে এদিনীয়াত অভিষেক ঘটায়।এইখন আছিল বিৰাটৰ প্ৰথমখন আন্তঃৰাষ্ট্ৰীয় মেচ।
ইন্দোৰত সংবাদ মাধ্যমৰ সন্মুখত সঞ্জয় জগদালে কয় যে, ভেংছাৰ্কাৰে কোহলীক প্ৰশংসা কৰিছিল আৰু জগদালক কৈছিল যে কোহলী এজন সুদক্ষ বেটছমেন। যদিও জগদালে তেতিয়া কোহলীৰ খেল দেখা নাছিল, কিন্তু ভেংছাৰ্কৰৰ জোৰত সকলো নিৰ্বাচকসকলে কোহলীক ৰাষ্ট্ৰীয় দলত স্থান দিবলৈ সন্মত হৈছিল। জগদালে কয় যে, কোহলীৰ আৰম্ভণিৰে পৰাই কেৱল প্ৰতিভাই নহয়, আত্মবিশ্বাস আৰু আক্ৰমণাত্মক মনোভাৱো আছিল, যিটো তেওঁ প্ৰমাণ কৰিছিল। তেওঁ কয় যে, যেতিয়া তেওঁলোকে কোহলীক টীম ইণ্ডিয়াত অন্তৰ্ভুক্ত কৰিছিল, তেতিয়া কিছুমানে তেওঁলোকক সমালোচনা কৰিছিল যে যুৱ খেলুৱৈ এজনক কেনেকৈ শ্ৰীলংকা ভ্ৰমণলৈ পঠিয়ালে? কিন্তু আজি এই লোকসকলক কোনেও মনত পেলোৱা নাই।
সঞ্জয় জগদলেই শচীন তেণ্ডুলকাৰৰ পিছতে কোহলীক ক্ৰিকেটৰ তিনিওটা ফৰ্মেটতে অন্যতম শ্ৰেষ্ঠ ভাৰতীয় বেটছমেন বুলি অভিহিত কৰে। বিচিচিআইৰ প্ৰাক্তন সম্পাদকগৰাকীয়ে কয় যে কোহলিয়ে টেষ্ট ক্ৰিকেটৰ পৰা অৱসৰ লোৱাৰ সিদ্ধান্তক সন্মান কৰা উচিত, কিন্তু তেওঁ এৰি থৈ যোৱা শূন্যতা ইমান সহজে পূৰণ কৰিব নোৱাৰি। উল্লেখ্য যে, বিৰাট কোহলীয়ে টেষ্ট ক্ৰিকেটত ১২৩খন খেল খেলিছে, য’ত তেওঁ ২১০ ইনিংছত গড়ে ৪৬.৮৫ ৰান কৰি ৯২৩০ ৰান সংগ্ৰহ কৰিছে। ইয়াৰ ভিতৰত ৩০টা শতক আৰু ৩১টা অৰ্ধশতক অন্তৰ্ভুক্ত।
