গৃহযুদ্ধত জৰ্জৰিত ছুডানত প্ৰাকৃতিক দুৰ্যোগে বিধ্বংসী ৰূপ ধাৰণ কৰিছে। বিগত কিছুদিনৰ পৰা হৈ থকা ধাৰাসাৰ বৰষুণৰ ফলত লোহিত সাগৰৰ সমীপত থকা আৰবাট বান্ধটো ভাঙি যোৱাৰ ফলত অতি কমেও ৬০ জন লোকৰ মৃত্যু হোৱাৰ লগতে হাজাৰ হাজাৰ ঘৰ বিধ্বস্ত হয়।
জানিব পৰা অনুসৰি, বিগত কেইবাদিনো ধৰি ছুডানত অব্যাহত আছে বৰষুণ। যাৰ বাবে পৰিস্থিতি ভয়ংকৰ হৈ পৰে। বান্ধটো ভাঙি যোৱাৰ বাবে এতিয়াও সন্ধানহীন হৈ আছে বহু লোক।
উল্লখ্য যে, গৃহযুদ্ধত জৰ্জৰিত আফ্ৰিকা মহাদেশৰ উত্তাৰঞ্চলত অৱস্থিত এইখন দেশ বিগত এবছৰ ধৰি অশান্ত হৈ আছে। ইয়াৰ মাজতে বান্ধটো ভাঙি যোৱাৰ ফলত দেশখনত অভাৱনীয় পৰিস্থিতিৰ উদ্ভৱ হৈছে। হাজাৰ-হাজাৰ লোকৰ ঘৰ-দুৱাৰ ভাঙি যোৱাৰ লগতে বাঢ়নী পানীত উটি গৈছে শ-শ বাহন।
দেশখনৰ স্বাস্থ্য মন্ত্ৰালয়ে জনোৱা অনুসৰি, চলিত বছৰটোত হোৱা নেৰানেপেৰা বৰষুণৰ ফলত সৃষ্টি হোৱা বানৰ ফলত এই পৰ্যন্ত ২০০ৰো অধিক লোকে প্ৰাণ হেৰুওৱাৰ লগতে ২৭ হাজাৰৰো অধিক পৰিয়াল গৃহহীন হৈ পৰিছে।
