নিজ প্ৰতিভাৰে কেৱল ৰাজ্যতে নহয়, দেশৰ লগতে সমগ্ৰ বিশ্বতে খলকনি তুলিছে অসমৰ এগৰাকী ৮ বছৰীয়া কন্যাই। ব্ৰিটেইন’ছ গট টেলেণ্টত নিজৰ অসাধাৰণ নৃত্য দক্ষতাৰে দৰ্শক আৰু বিচাৰকৰ হৃদয় আকৰ্ষণ কৰে কাৰ্বি আংলঙৰ বোকাজানৰ বিনীতা চেত্ৰীয়ে।
বিনীতা চেত্ৰীয়ে ব্ৰিটেইন’ছ গট টেলেণ্ট ২০২৫ৰ চমকপ্ৰদ অডিচনেৰে ইণ্টাৰনেটক ধুমুহাৰ সৃষ্টি কৰিছে। ত্ৰুটিহীন খোজ, বেকফ্লিপ আৰু অবিশ্বাস্য নমনীয়তাৰে ভৰি থকা তেওঁৰ নৃত্যশৈলীয়ে বিচাৰক আৰু দৰ্শক উভয়কে মন্ত্ৰমুগ্ধ কৰি পেলায়।
বিনীতাৰ বাবে ব্ৰিটেইন’ছ গট টেলেণ্ট হৈছে তেওঁৰ “সপোনৰ মঞ্চ”, কিয়নো তাত তেওঁ নিজৰ প্ৰতিভা দৰ্শকৰ সন্মুখত প্ৰদৰ্শন কৰিবলৈ সক্ষম হয়। প্ৰথম ৰাউণ্ডত উন্নত প্ৰদৰ্শনৰ লগে লগে বিনীতাই গোলাপী ৰঙৰ ৰাজকুমাৰীৰ ঘৰ এটা ক্ৰয় কৰাৰ সপোন পুহি ৰাখিছে বুলি জানিবলৈ দিয়ে।
তেওঁৰ চমকপদ নৃত্যই শ্ব’টোৰ প্ৰতিষ্ঠিত বিচাৰক পেনেলৰ দৃষ্টি আকৰ্ষণ কৰে।
অসমৰ এই ৮ বছৰীয়া সফলতাত অসমৰ মুখ্যমন্ত্ৰী ড০ হিমন্ত বিশ্ব শৰ্মাই অভিনন্দন জ্ঞাপন কৰে।
উল্লেখ্য যে, বিনীতাই ৰাজস্থানত থকা নিজৰ পেহীয়কৰ পৰা নৃত্যৰ অনুশীলন লৈছিল।
