হিংসাৰ দাৱানলত জ্বলি থকা মণিপুৰৰ পৰা আহিছে এটা ভাল খবৰ। ৰাজ্যখনত শান্তি ঘূৰাই আনিবলৈ প্ৰযোজ্য কৰা হৈছে ৰাষ্ট্ৰপতি শাসন। অস্ত্ৰধাৰী লোকসকলক আত্মসমৰ্পণ আৰু লুটপাত কৰা অস্ত্ৰসমূহ ঘূৰাই দিবলৈ গৃহ মন্ত্ৰালয় তথা প্ৰশাসনৰ তৰফৰ পৰা জনোৱা আহ্বান ফলপ্ৰসু হোৱা পৰিলক্ষিত হৈছে।
ৰাষ্ট্ৰপতি শাসন প্ৰযোজ্য হোৱা ১৪ দিনৰ পিছত ৰাজ্যখনৰ এটা বৃহত অস্ত্ৰধাৰী দলে আত্মসমৰ্পণ কৰাৰ খবৰ আহিছে। মূল সুঁতিলৈ ঘূৰি অহা এই অস্ত্ৰধাৰী লোকসকলে বৃহত পৰিমাণৰ অস্ত্ৰ-শস্ত্ৰও ত্যাগ কৰে।
যোৱা ২৫ ফেব্ৰুৱাৰীত মণিপুৰৰ ৰাজ্যপাল অজয় কুমাৰ ভল্লাক সাক্ষাৎ কৰাৰ পিছত আজি মেইটেই সংগঠন ‘আৰম্বাই টেংগোল’ৰ সদস্যসকলে অস্ত্ৰ-শস্ত্ৰসহ আত্মসমৰ্পণ কৰে।
উল্লেখ্য যে, ৰাজ্যখনৰ প্ৰাক্তন মুখ্যমন্ত্ৰী এন বীৰেন সিঙে পদত্যাগ কৰাৰ পিছতে ৰাজ্যখনত প্ৰযোজ্য হয় ৰাষ্ট্ৰপতি শাসন। মুখ্যমন্ত্ৰী পদৰ পৰা বীৰেন সিঙে পদত্যাগ কৰাৰ পিছত বিজেপিয়ে পৰৱৰ্তী মুখ্যমন্ত্ৰীৰ বাবে নেতা বাচনি কৰাত ব্যৰ্থ হোৱাত ৰাজ্যখনত প্ৰযোজ্য কৰা হয় ৰাষ্ট্ৰপতি শাসন।
