পুনৰবাৰ বাতৰিৰ শিৰোণামত দিল্লীৰ মুখ্যমন্ত্ৰীৰ বাসগৃহ। দিল্লী চৰকাৰৰ গড়কাপ্তানি বিভাগে ছীল কৰিলে মুখ্যমন্ত্ৰীৰ আৱাসগৃহ। অবৈধভাৱে ব্যৱহাৰ কৰাৰ অভিযোগত মুখ্যমন্ত্ৰীৰ বাসগৃহটো ছীল কৰা হৈছে বুলি জানিব পৰা গৈছে।
মুখ্যমন্ত্ৰীৰ বাসগৃহ ছীল কৰাৰ পিছতে দিল্লীৰ মুখ্যমন্ত্ৰী আতিশী মাৰ্লেনাৰ কাৰ্যালয়ে এক বিবৃতি প্ৰকাশ কৰি কয় যে দেশৰ ইতিহাসত প্ৰথমবাৰৰ বাবে কোনো মুখ্যমন্ত্ৰীৰ বাসগৃহ খালী কৰা হৈছে। লগতে উপ-ৰাজ্যপাল ভি কে ছাক্সেনাই বিজেপিৰ নিৰ্দেশত কাম কৰাৰ অভিযোগো উত্থাপন কৰিছে।
বুধবাৰে দিল্লী চৰকাৰৰ গড়কাপ্তানী বিভাগৰ এটা দলে মুখ্যমন্ত্ৰীৰ বাসগৃহ ছীল কৰিবলৈ উপস্থিত হয়। মুখ্যমন্ত্ৰীৰ বাসগৃহ ছীল কৰাৰ কাৰণ হস্তান্তৰ প্ৰক্ৰিয়া অনুসৰণ নকৰা বুলি উল্লেখ কৰা হৈছে।
মুখ্যমন্ত্রী আতিশীৰ কার্যালয়ে প্রকাশ কৰা এক বিবৃতিত কোৱা হৈছে যে দেশৰ ইতিহাসত প্রথমবাৰৰ বাবে মুখ্যমন্ত্রীৰ বাসগৃহ খালী হৈছে৷ লেফটেনেণ্ট গৱৰ্ণৰ ভি কে ছাক্সেনাৰ বিৰুদ্ধে ডাঙৰ অভিযোগ উত্থাপন কৰি বিবৃতিটোত কয় যে বিজেপিৰ নিৰ্দেশত উপ-ৰাজ্যপালগৰাকীয়ে মুখ্যমন্ত্ৰীৰ বাসগৃহৰ পৰা মুখ্যমন্ত্ৰী আতিশীৰ সামগ্ৰী বলপূৰ্বকভাৱে আঁতৰাই দিয়ে।
লগতে কয় যে উপ-ৰাজ্যপালৰ হৈ মুখ্যমন্ত্ৰীৰ বাসগৃহ বিজেপিৰ এজন জ্যেষ্ঠ নেতাক আবণ্টন দিয়াৰ প্ৰস্তুতি চলি আছে। ২৭ বছৰ ধৰি দিল্লীত শাসনৰ পৰা আঁতৰি থকা বিজেপিয়ে এতিয়া মুখ্যমন্ত্ৰীৰ বাসগৃহ দখল কৰিব বিচাৰিছে।
উল্লেখ্য যে, কিছুদিন পূৰ্বে দিল্লীৰ মুখ্যমন্ত্ৰীৰ পদৰ পৰা পদত্যাগ কৰাৰ পিছত অৰবিন্দ কেজৰিৱালে মুখ্যমন্ত্ৰী বাসগৃহ খালী কৰিছিল। অৱশ্যে বিজেপিয়ে ধাৰাবাহিকভাৱে কেজৰিৱালৰ বিৰুদ্ধে মুখ্যমন্ত্ৰী বাসগৃহ ব্যৱহাৰ কৰাৰ অভিযোগ উত্থাপন কৰি আহিছে।
