মাইকী মহৰ দ্বাৰা বিয়পা ডেংগু ভাইৰাছৰ ভেকচিন অহা বছৰৰ ভিতৰত উপলব্ধ হ’ব ভাৰতত। ডেংগুৰ প্ৰতিষেধক ঔষধৰ বিষয়ে ইতিমধ্যেই তৃতীয় পৰ্যায়ৰ পৰীক্ষা চলি আছে আৰু স্বাস্থ্য মন্ত্ৰালয়ৰ সচিবে ৰাজ্যসমূহৰ সৈতে ডেংগু সন্দৰ্ভত বৈঠকত মিলিত হৈছে।
ভাৰতত চাৰিটা কোম্পানীয়ে ডেংগু ভেকচিনৰ পৰীক্ষা চলাই আছে। বজাৰত এই ভেকচিনৰ আগমনৰ লগে লগে মানুহে যথেষ্ট সকাহ পাব। এই ভেকচিন প্ৰৱৰ্তনৰ পিছত ডেংগু ৰোগীৰ মৃত্যুৰ সংখ্যা যথেষ্ট হ্ৰাস পাব বুলি অনুমান কৰা হৈছে।
এই তথ্য কেন্দ্ৰীয় স্বাস্থ্য মন্ত্ৰালয়ৰ সম্পাদক অপূৰ্ব চন্দ্ৰই ৰাজ্যসমূহৰ সৈতে হোৱা বৈঠকৰ অন্তত সদৰি কৰে। আৰু লগতে তেওঁ উল্লেখ কৰে যে যোৱা বছৰৰ তুলনাত চলিত বছৰত ডেংগু ৰোগীৰ সংখ্যা অধিক দেখা গৈছে।
ডেংগু সন্দৰ্ভত ৰাজ্যসমূহলৈ জাৰি কৰা হৈছে নিৰ্দেশনা
ডেংগু সন্দৰ্ভত ৰাজ্যসমূহৰ সৈতে বৈঠকত মিলিত হৈছে বুলি স্বাস্থ্য মন্ত্ৰালয়ৰ সচিবগৰাকীয়ে জানিবলৈ দিয়ে। এইবছৰ ডেংগু ৰোগীৰ সংখ্যা তুলনামূলকভাৱে বৃদ্ধিৰ প্ৰতি লক্ষ্য ৰাখি ৰাজ্যসমূহৰ বাবে গাইডলাইন জাৰি কৰা হৈছে।
তেওঁ কয় যে আগষ্ট, ছেপ্টেম্বৰ, অক্টোবৰ আৰু নৱেম্বৰ মাহত ডেংগুৰ ৰোগীৰ সংখ্যা সৰ্বাধিক হয় । তেওঁ লগতে কয় যে প্লেটলেটৰ উপস্থিতি সন্দৰ্ভত সকলো ৰাজ্যৰ সৈতে আলোচনা কৰা হৈছে আৰু ২০০০ চনলৈকে ডেংগুৰ ফলত হোৱা মৃত্যুৰ হাৰ ৩ শতাংশ আছিল আৰু বৰ্তমান ই ০.১ শতাংশ।
যোৱা বছৰৰ তুলনাত বৃদ্ধি পাইছে ডেংগু ৰোগী
কেন্দ্রীয় স্বাস্থ্য মন্ত্র্যালয়ৰ সচিবগৰাকীয়ে কয় যে এইবাৰ ডেংগু ৰোগীৰ সংখ্যা ধাৰাবাহিকভাৱে বৃদ্ধি পাইছে। বৰ্তমান দক্ষিণ আৰু পশ্চিম ভাৰতত আক্ৰান্তৰ সংখ্যাও অনাকাংক্ষিতভাৱে বৃদ্ধি হৈছে। উত্তৰ ভাৰতত এতিয়ালৈকে ডেংগুত কোনো লোক আক্ৰান্ত হোৱা নাই। তামিলনাডু, কেৰালা, মহাৰাষ্ট্ৰ আৰু কৰ্ণাটকত বৃদ্ধি পাইছে ডেংগু ৰোগী। ইয়াৰ প্ৰতি লক্ষ্য ৰাখি ৰাজ্যসমূহলৈ গাইডলাইন জাৰি কৰা হৈছে।
এই সন্দৰ্ভত সচিবগৰাকীয়ে কয় যে সকলো ৰাজ্যকে স্বাস্থ্য মন্ত্ৰালয়ে ডেংগু প্ৰতিৰোধৰ ব্যৱস্থা গ্ৰহণ কৰিবলৈ পৰামৰ্শ দিছে। ডেংগু ৰোগ বিয়পাৰ আশংকা অক্টোবৰ মাহটোত অত্যাধিক পৰিমানে থাকে। সচৰাচৰ আগষ্ট মাহৰ পৰা অক্টোবৰ মাহলৈকে ডেংগু আক্রান্তৰ সংখ্যা অত্যাধিক হয় আৰু নৱেম্বৰ মাহৰ পৰা এই ৰোগীৰ সংখ্যা হ্ৰাস হ’বলৈ ধৰে।
