অসম চৰকাৰৰ তদাৰকী ও দুৰ্নীতি নিবাৰক শাখাৰ আন এক সফল অভিযান। ধাৰাবাহিকভাৱে চলাই থকা অভিযানৰ পিছতো যেন একাংশ চৰকাৰী বিষয়া-কৰ্মচাৰীয়ে কেৰেপ নকৰে এনে ধৰণৰ দুৰ্নীতি পৰায়ন কাম কৰিবলৈ। যাৰ পৰিপ্ৰেক্ষিতত পুনৰ পোহৰলৈ আহিল অসম চৰকাৰৰ তদাৰকী ও দুৰ্নীতি নিবাৰক শাখাৰ আন এক সফল অভিযান।
ৰাজ্যৰ বিভিন্ন প্ৰান্তৰ পিছত এইবাৰ ডুমডমা ৰাজহ চক্ৰ বিষয়া কাৰ্যালয়ত ঘোচ লোৱাৰ ঘটনা পোহৰলৈ আহিছে। চৰকাৰ তথা প্ৰশাসনক কেৰেপ নকৰাকৈ দীৰ্ঘদিনে চলাই গৈছিল ঘোচৰ নামত অবাধ বেহা।
উৎকোচ নিদিলেই কোনো কাম নকৰাৰ অভিযোগ লাট মণ্ডল জোখেশ্বৰ মৰাণৰ বিৰুদ্ধে। এক প্ৰকাৰে যেন অৰাজকতাৰে ভৰি পৰিছিল ডুমডুমা ৰাজহ চক্ৰ বিষয়া কাৰ্যালয়। কিন্তু দুৰ্নীতি নিবাৰক শাখাৰ অভিযানত সামৰণি পৰিল জোখেশ্বৰৰ ক’লা অধ্যায়।
শেহতীয়াকৈ এগৰাকী মহিলাৰ পৰা ৪০ হাজাৰ টকা উৎকোচ লোৱাৰ অপচেষ্টা চলাইছিল লাট মণ্ডল জোখেশ্বৰে। পিছে ১৫ হাজাৰ উৎকোচ লোৱাৰ সময়তে হাতে-লোটে আটক কৰে অসম চৰকাৰৰ তদাৰকী ও দুৰ্নীতি নিবাৰক শাখাৰ এটা দলে।
কাৰ্যালয়টোৰ অন্য বিষয়াসকলকো লজ্জিত কৰি হাত দাঙিবলৈ বাধ্য হ’ল জোখেশ্বৰ মৰাণ। ইতিমধ্যে জোখেশ্বৰক নগদ ধনসহ আটক কৰি অধিক তদন্তৰ বাবে জেৰা অব্যাহত ৰাখিছে অসম চৰকাৰৰ তদাৰকী ও দুৰ্নীতি নিবাৰক শাখাই।
