‘অসমৰ ৫টা বিধান সভা সমষ্টিৰ উপ-নিৰ্বাচনৰ ফলাফলে প্ৰমাণ কৰে যে ভৱিষ্যতলৈ বিজেপি মিত্ৰশক্তিক পৰাস্ত কৰিবলৈ হ’লে বিজেপি বিৰোধী শক্তিসমূহৰ ঐক্যবদ্ধতাৰ বিকল্প নাই’, এই মন্তব্য অসম সন্মিলিত মৰ্চা চমুকৈ অসম মিত্ৰজোঁটৰ।
মিত্ৰজোঁটৰ সভাপতি তথা সাংসদ অজিত কুমাৰ ভূঞা আৰু সাধাৰণ সম্পাদক লুৰীণজ্যোতি গগৈয়ে শনিবাৰে এক প্ৰেছ বিজ্ঞপ্তিত কয়, ‘আজি ভোটগণনা হোৱা অসমৰ বিহালী, চামগুৰি, বঙাইগাঁও, চিদলী আৰু ধলাই বিধানসভা সমষ্টিৰ উপ-নিৰ্বাচনৰ ফলাফল গণতান্ত্ৰিক আৰু ধৰ্মনিৰপেক্ষ ৰাজনীতিৰ বাবে শুভ লক্ষণ নহয় যদিও ৰাইজৰ মতামতক সন্মান জনোৱা তথা গণতান্ত্ৰিক নিয়ম অনুসৰি আমি পাঁচোগৰাকী বিজয়ী প্ৰাৰ্থীক অভিনন্দন জনাইছো।’
ভূঞা আৰু গগৈয়ে বিবৃতিটোত কয় যে উপ-নিৰ্বাচন সন্দৰ্ভত ৰাইজৰ মতৰ পূৰ্বানুমান কৰিয়েই অসম মিত্ৰজোঁটে আৰম্ভণিৰে পৰা ঐক্যবদ্ধভাৱে নিৰ্বাচনত অৱতীৰ্ণ হোৱাৰ পোষকতা কৰিছিল, যিটো কংগ্ৰেছ দলে উপলব্ধি নকৰিলে।
উপ-নিৰ্বাচনৰ ফলাফলত তাৰেই প্ৰতিফলন ঘটা বুলি উল্লেখ কৰি গগৈ আৰু ভূঞাই কয় যে অসম মিত্ৰজোঁট অনাগত দিনত ঐক্যবদ্ধতাৰে বিজেপি বিৰোধী ৰাজনৈতিক যুঁজখন আগবঢ়াই লৈ যাবলৈ সংকল্পবদ্ধ৷
