২৭ ছেপ্টেম্বৰত তামিলনাডুৰ কাৰুৰত অনুষ্ঠিত হোৱা এক ৰেলীত হোৱা ভয়াবহতাত ৪০ জন লোকৰ প্ৰাণহানি হোৱাৰ লগতে আহত হয় প্ৰায় ১০০ জন ।
এই ঘটনাৰ পিছতে অভিনেতা তথা ৰাজনৈতিক নেতা বিজয়ৰ দল টিভিকে ৰাজ্য চৰকাৰক ডিএমকেৰ ষড়যন্ত্ৰৰ অংশ বুলি অভিযোগ উত্থাপন কৰিছে।
টিভিকেৰ অধিবক্তা অৰিভাঝাগনে কয় যে দলটোৱে মাদ্ৰাজ উচ্চ ন্যায়ালয়ত এখন আবেদন দাখিল কৰিছে, বিশেষ তদন্তকাৰী দল (এছআইটি) গঠন বা গোচৰটো চিবিআইলৈ হস্তান্তৰ কৰিবলৈ বিচাৰিছে। এই সমাৱেশত সুৰক্ষাৰ নিয়ম উলংঘা কৰা বুলি ৰাজ্য চৰকাৰৰ দাবীক তেওঁ নাকচ কৰে।
অৰিভাজাগানে কয় যে, কাৰুৰ কাণ্ড আছিল এক ষড়যন্ত্ৰ। তেওঁলোকে স্থানীয় বাসিন্দাসকলৰ পৰা নিৰ্ভৰযোগ্য তথ্য আৰু কিছু চিচিটিভি ফুটেজ লাভ কৰিছে। ইয়াৰ পৰা দেখা যায় ৰাজ্যৰ শাসকীয় দলৰ একাংশ কৰ্মীয়ে ষড়যন্ত্ৰ কৰিছিল।
ৰাজ্য চৰকাৰে উল্লেখ কৰে যে, দুপৰীয়াৰ পৰা ৰেলী স্থানত ভিৰ হৈছিল যদিও বিজয় উপস্থিত হয় সন্ধিয়া ৭ বজাত। ৰেলী স্থলীত ১০ হাজাৰ লোকৰ বাসস্থান আছিল যদিও ২৭ হাজাৰ লোকৰ সমাগম ঘটে। ৰাজ্য চৰকাৰে ইয়াক ইচ্ছাকৃতভাৱে জনসমাগম বৃদ্ধিৰ প্ৰয়াস বুলি অভিহিত কৰে। ইফালে টিভিকেৰ অধিবক্তাই এই দাবী খণ্ডন কৰি কয় যে, বিজয়ৰ পলমকৈ অহাৰ কাৰণ আছিল তীব্ৰ যান-জঁট, ইয়াত দলৰ কোনো দোষ নাই।
এই সমাৱেশত নিৰাপত্তা বিধি উলংঘা কৰাৰ অভিযোগ উত্থাপন কৰি ৰাজ্য চৰকাৰে হত্যাকে ধৰি বিভিন্ন ধাৰাত টিভিকেৰ একাংশ নেতাৰ বিৰুদ্ধে গোচৰ ৰুজু কৰিছে। উচ্চ ন্যায়ালয়ৰ অৱসৰপ্ৰাপ্ত ন্যায়াধীশৰ নেতৃত্বত ন্যায়িক তদন্তৰো নিৰ্দেশ দিয়া হৈছে।
