ভাৰতৰ ব্যৱসায়-বাণিজ্যত কোপদৃষ্টি পৰিছে আমেৰিকাৰ ৰাষ্ট্ৰপতি ড’নাল্ড ট্ৰাম্পৰ। বিশ্বৰ অন্যতম জনপ্ৰিয় তথা ব্ৰেণ্ডেড মোবাইল ফোন আইফোনৰ উৎপাদন ভাৰতত নকৰিবলৈ আহ্বান জনাইছে এপ’লৰ চিইঅ’ টিম কুকক। বিশ্বৰ অৰ্থনীতিত ক্ৰমান্বয়ে বিস্তাৰ সাধন কৰিবলৈ সক্ষম হোৱা ভাৰতক লৈ যে ট্ৰাম্প সুখী নহয় সেই কথা এই মন্তব্যৰ পৰা স্পষ্ট হৈ পৰিছে।
উল্লেখ্য যে, ভাৰতক লৈ এপ’লে কৰিছিল ডাঙৰ পৰিকল্পনা। অহা বৰ্ষৰ ভিতৰত তেওঁলোকে ভাৰতত বৃহৎ পৰিমাণত আইফোন উৎপাদন কৰাৰ পৰিকল্পনা কৰিছিল।
সম্প্ৰতি কাটাৰ ভ্ৰমণত আছে আমেৰিকাৰ ৰাষ্ট্ৰপতি ড’নাল্ড ট্ৰাম্প। এই সময়ছোৱাতে তেওঁ সংবাদ মাধ্যমক সম্বোধন কৰি কয়, ‘টিম কুকৰ লগত মোৰ এটা সৰু সমস্যা আছে। তেওঁলোকে ভাৰতত আইফোন বনাব বিচাৰে আৰু মই সেইটো হোৱাটো নিবিচাৰো। এপ’লে নিজৰ ফোনসমূহ কেৱল আমেৰিকাতহে নিৰ্মাণ কৰক।’
যদি এপ’লে নিজৰ এছেম্বলি ইউনিট ভাৰতলৈ স্থানান্তৰ কৰে তেন্তে ২০২৬ চনৰ পৰা ইয়াত প্ৰতি বছৰে ৬ কোটিতকৈ অধিক আইফোন উৎপাদন হ’ব। এয়া বৰ্তমানৰ ক্ষমতাৰ দুগুণতকৈও অধিক হ’ব।
বৰ্তমান আইফোন উৎপাদনত চীনে আধিপত্য বিস্তাৰ কৰি আছে। ইফালে যদিহে এপ’লে ভাৰতত উৎপাদন বন্ধ কৰে তেন্তে আইফোন ব্যয়বহুল হ’ব পাৰে।
উল্লেখ্য যে, আইফোনৰ উৎপাদন চীনৰ পৰা ভাৰতলৈ স্থানান্তৰিত কৰাৰ যোজা চলাই থকাৰ সময়তে ট্ৰাম্প আৰু এপ’লৰ চিইঅ’ কুকৰ মাজত হোৱা মতভেদে ভাৰতৰ অৰ্থনীতিত যে বিৰূপ প্ৰভাৱ পেলাব সেয়া নিশ্চিত।
