২০২৬ বৰ্ষত অনুষ্ঠিত হ’বলগীয়া ৪খন ৰাজ্যৰ বিধানসভা নিৰ্বাচনৰ প্ৰস্তুতি ইতিমধ্যে কংগ্ৰেছে আৰম্ভ কৰিছে। এই সন্দৰ্ভত কংগ্ৰেছ হাইকমাণ্ডে নিৰ্বাচনী ৰাজ্যসমূহৰ জ্যেষ্ঠ নেতাসকলৰ সৈতে বৈঠকৰ আহ্বান কৰিছে।
কংগ্ৰেছৰ সভাপতি মল্লিকাৰ্জুন খাৰ্গে আৰু ৰাহুল গান্ধীয়ে ২৭ আৰু ২৮ ফেব্ৰুৱাৰীত অসমৰ দলৰ নেতাসকলৰ সৈতে আলোচনাত মিলিত হ’ব।
অসমত বিজেপি আৰু কেৰালাত বাওঁ মঞ্চৰ হাতত একেৰাহে দ্বিতীয়বাৰৰ বাবে বিধানসভা নিৰ্বাচনত পৰাস্ত হৈছে কংগ্ৰেছ। এনে পৰিস্থিতিত দুয়োখন ৰাজ্যতে পুনৰ প্ৰত্যাৱৰ্তন কৰাটো কংগ্ৰেছৰ বাবে এক ডাঙৰ প্ৰত্যাহ্বান।
২০২১ চনত কেৰালাত প্ৰতি ৫ বছৰৰ মূৰে মূৰে চৰকাৰ সলনি কৰাৰ পৰম্পৰা ভংগ কৰি একেৰাহে দ্বিতীয়বাৰৰ বাবে পিনাৰায়ী বিজয়নে জয়লাভ কৰিছিল।
শশী থাৰুৰৰ বিদ্ৰোহী মনোভাৱৰ বাবেই কেৰালাত দলীয়তাবাদৰ সমস্যাৰ সন্মুখীন হোৱাত বিগত কিছুদিনত কংগ্ৰেছৰ অশান্তি বৃদ্ধি হৈছে। এক সূত্ৰ অনুসৰি, থাৰুৰে পক্ষ সলনি কৰিবলৈ যোৱা নাই যদিও নিৰ্বাচনী বৰ্ষৰ প্ৰতি লক্ষ্য ৰাখি দলত তেওঁৰ গুৰুত্ব বৃদ্ধি হোৱাটো বিচাৰে। এই সন্দৰ্ভত বিগত কিছুদিনত তেওঁ ৰাহুল গান্ধীৰ সৈতেও মিলিত হয়। অনুমান কৰা হৈছে যে, থাৰুৰে কেৰালাত মুখ্যমন্ত্ৰীৰ চকীখনৰ ওপৰত চকু নিৱদ্ধ কৰি ৰাখিছে, যাৰ বাবে ইতিমধ্যে বহু প্ৰতিদ্বন্দ্বী আছে।
আনহাতে, অসমত বিজেপিৰ ফায়াৰব্ৰেণ্ড মুখ্যমন্ত্ৰী হিমন্ত বিশ্ব শৰ্মাৰ প্ৰত্যাহ্বানৰ সন্মুখীন হৈছে কংগ্ৰেছ। কংগ্ৰেছে তেওঁৰ বিৰুদ্ধে দুৰ্নীতিৰ গুৰুতৰ অভিযোগ উত্থাপন কৰি পৰিৱেশ সৃষ্টি কৰিবলৈ চেষ্টা কৰিছে যদিও দলৰ সন্মুখত আটাইতকৈ ডাঙৰ প্ৰশ্নটো হ’ল সাংসদ গৌৰৱ গগৈক আগুৱাই লৈ নিৰ্বাচনত অৱতীৰ্ণ হ’ব লাগে নেকি?
বিগত বিধানসভা নিৰ্বাচনত কংগ্ৰেছে মুছলমান নেতা বদৰুদ্দিন আজমলৰ দল AIUDFৰ সৈতে মিত্ৰতা কৰিছিল যদিও এইবাৰ কংগ্ৰেছে আঞ্চলিক দলৰ সৈতে ফ্ৰণ্ট গঠন কৰিছে।
অসম, কেৰালা আৰু বিহাৰৰ পাছতো তামিলনাডু, পুডুচেৰী আৰু পশ্চিমবংগ সন্দৰ্ভত এখন বৈঠক অনুষ্ঠিত হ’ব। কেন্দ্ৰীয় শাসিত অঞ্চল পুডুচেৰীত কংগ্ৰেছে বিজেপি চৰকাৰৰ বিৰুদ্ধে প্ৰত্যক্ষ যুঁজ দি আছে, আনহাতে তামিলনাডুত কংগ্ৰেছ ডি এম কেৰ ওপৰত নিৰ্ভৰশীল। এতিয়া এই নিৰ্বাচনৰ বাবে কংগ্ৰেছে কি কৌশল ৰচনা কৰে, তাকে লৈ সকলোৰে দৃষ্টি নিৱদ্ধ হৈ আছে।
