দেশৰ নিৰ্বাচন আয়োগৰ মুখ্য নিৰ্বাচন আয়ুক্ত হিচাপে জ্ঞানেশ কুমাৰে নিযুক্তি লাভ কৰিছে। ১৮ ফেব্ৰুৱাৰীত ৰাজীৱ কুমাৰৰ পদত্যাগৰ পাছতেই দায়িত্বভাৰ গ্ৰহণ কৰিব জ্ঞানেশ কুমাৰে।
১৯ ফেব্ৰুৱাৰীত দেশৰ নিৰ্বাচন আয়ুক্তৰ পদ গ্ৰহণ কৰাৰ পাছতে জ্ঞানেশ কুমাৰৰ কাৰ্যকাল ২০২৯ চনৰ ২৬ জানুৱাৰীলৈ থাকিব। ইতিমধ্যে এই সন্দৰ্ভত এক অধিসূচনা জাৰি কৰা হৈছে । ইয়াত কোৱা হৈছে যে, মুখ্য নিৰ্বাচন আয়ুক্ত আৰু অন্যান্য নিৰ্বাচন আয়ুক্ত আইন-২০২৩ৰ ধাৰা ৪ৰ ক্ষমতা প্ৰয়োগ কৰি ৰাষ্ট্ৰপতিয়ে নিৰ্বাচন আয়ুক্ত জ্ঞানেশ কুমাৰক মুখ্য নিৰ্বাচন আয়ুক্ত হিচাপে নিযুক্তি দিছে। বৰ্তমান জ্ঞানেশ কুমাৰৰ ঠাইত নিৰ্বাচন আয়ক্ত হ’ব ড০ বিবেক যোশী।
মাৰ্চ মাহৰ পৰা তেওঁ নিৰ্বাচন আয়ুক্তৰ পদত অধিষ্ঠিত হৈ আহিছে। ইয়াৰ মাজতে জ্ঞানেশ কুমাৰক দেশৰ ৰাষ্ট্ৰপতিয়ে পৰৱৰ্তী মুখ্য নিৰ্বাচন আয়ুক্ত হিচাপে নিযুক্তি প্ৰদান কৰে। নতুন আইনৰ ভিত্তিত বাচনি কৰা জ্ঞানেশ কুমাৰ হৈছে দেশৰ প্ৰথমগৰাকী মুখ্য নিৰ্বাচন আয়ুক্ত।
নতুন আইনৰ ভিত্তিত এইবাৰ দেশৰ মুখ্য নিৰ্বাচন আয়ুক্ত বাচনি কৰা হৈছে । এই আইন অনুসৰি মুখ্য নিৰ্বাচন আয়ুক্ত বাচনিৰ সময়ত প্ৰধানমন্ত্ৰী, বিৰোধী দলৰ দলপতি আৰু কেন্দ্ৰীয় গৃহমন্ত্ৰীৰ সহমতিৰ প্ৰয়োজন হয়। এক কথাত, এইবাৰ মুখ্য নিৰ্বাচন আয়ুক্ত নিৰ্বাচনৰ সময়ত এইবাৰ অমিত শ্বাহে গুৰুত্বপূৰ্ণ ভূমিকা পালন কৰিছে।
সোমবাৰে সন্ধিয়া প্ৰধানমন্ত্ৰী নৰেন্দ্ৰ মোডীৰ নেতৃত্বত গঠিত তিনিজনীয়া বাছনি সমিতিখনে জ্ঞানেশ কুমাৰৰ নাম সন্দৰ্ভত পৰামৰ্শ আগবঢ়ায় আৰু ৰাষ্ট্ৰপতি দ্ৰৌপদী মুৰ্মুয়ে অনুমোদন জনায়।
ইফালে কেৰালা কেডাৰৰ ১৯৮৮ বেচৰ আই এ এছ বিষয়া জ্ঞানেশ কুমাৰ কেন্দ্ৰীয় গৃহ মন্ত্ৰালয়ৰ অংশ আছিল। ২০১৯ চনত জম্মু-কাশ্মীৰত ৩৭০ অনুচ্ছেদ বিলুপ্ত কৰা বিধেয়কখনৰ খচৰা প্ৰস্তুত কৰাত সহায় কৰিছিল।
২০২২ চনৰ মে’ মাহৰ পৰা অমিত শ্বাহ নেতৃত্বাধীন মন্ত্ৰালয়ৰ সম্পাদক হিচাপে কাৰ্যনিৰ্বাহ কৰি আছিল তেওঁ।
গৃহ মন্ত্ৰণালয়ত কাম কৰাৰ পাঁচ বছৰৰ অভিজ্ঞতা আছে। ইয়াৰ পূৰ্বে ২০১৬ চনৰ মে’ মাহৰ পৰা ২০১৮ চনৰ ছেপ্টেম্বৰ মাহলৈ যুটীয়া সচিব আৰু তাৰ পিছত ২০১৮ চনৰ ছেপ্টেম্বৰৰ পৰা ২০২১ চনৰ এপ্ৰিললৈকে অতিৰিক্ত সচিব হিচাপে কাৰ্যনিৰ্বাহ কৰিছিল।
ত্ৰিগুণ তালাক বিলুপ্তিৰ সৈতে জড়িত খচৰা প্ৰস্তুত সমিতিতো তেওঁ গুৰুত্বপূৰ্ণ ভূমিকা পালন কৰিছে।
গৃহ মন্ত্ৰালয়ত অতিৰিক্ত সম্পাদকৰ পদত অধিষ্ঠিত হৈ থকাৰ সময়তে অযোধ্যাৰ ৰাম মন্দিৰৰ সৈতে জড়িত গোচৰৰ উচ্চতম ন্যায়ালয়ত শুনানিৰ সময়ত আনুষংগিক নথি-পত্ৰ চম্ভালাৰ দায়িত্বও লৈ আহিছে।
সচিব হিচাপে কাৰ্যনিৰ্বাহ কৰি থকাৰ সময়তে যোৱা বছৰ তেওঁ সহযোগিতা মন্ত্ৰালয়ৰ পৰা অৱসৰ গ্ৰহণ কৰিছিল।
