গুজৰাটৰ কচ্চ জিলাত শনিবাৰে বিয়লি সংঘটিত হয় এক মৰ্মান্তিক দুৰ্ঘটনা। এটা পুখুৰীত গা ধুবলৈ গৈ চাৰিটা শিশুৱে কৰুণ মৃত্যুক সাৱটি লয়। জানিব পৰা অনুসৰি এতিয়াও এটি শিশু সন্ধানহীন হৈ আছে। নিৰুদ্দেশ হৈ থকা শিশুটিৰ সন্ধান অব্যাহত আছে। ইফালে এই দুৰ্ঘটনাৰ তদন্তত ব্যস্ত আৰক্ষী আৰু স্থানীয় প্ৰশাসন।
দুধই থানাৰ এগৰাকী বিষয়াই জনোৱা মতে, শিশু কেইজনে গৰু চৰাবলৈ গৈছিল আৰু ইয়াৰ পিছত গৰমৰ পৰা সকাহ পাবলৈ ওচৰতে থকা এটা পুখুৰীত গা ধুবলৈ নামে। কিন্তু পুখুৰীটোৰ গভীৰতাত সোমাই যোৱা বাবে শিশু কেইটা ডুব যায়।
ইফালে সন্ধিয়ালৈকে শিশু কেইটা ঘৰলৈ উভতি নোযোৱাত তেওঁলোকৰ পৰিয়ালৰ লোকে বিচাৰ-খোচাৰ কৰিবলৈ আৰম্ভ কৰে। বহু চেষ্টাৰ পিছতো শিশুকেইটাক বিচাৰি নোপোৱাত পৰিয়ালৰ লোকে স্থানীয় প্ৰশাসন আৰু আৰক্ষীক খবৰ দিয়ে। ইয়াৰ পিছত উদ্ধাৰকাৰী দলে সেই স্থানত উপস্থিত হৈ অনুসন্ধান আৰম্ভ কৰে।
উদ্ধাৰ অভিযানৰ সময়ত পুখুৰীটোৰ পৰা উদ্ধাৰ কৰে চাৰিটা শিশুৰ মৃতদেহ। নিহত কেইজন হৈছে ইছমাইল (৮), উমৰ (১১), মুস্তাক (১৪) আৰু আছফাক (৯)। ইফালে, ১১ বছৰীয়া জাহিদ এতিয়াও সন্ধানহীন হৈ আছে আৰু তেওঁক বিচাৰি উদ্ধাৰ অভিযান অব্যাহত আছে।
ইফালে, এইধৰণৰ দ’ খাৱৈ বা গভীৰ পানী থকা অঞ্চলসমূহলৈ যাতে কোনো শিশুকে অকলে নপঠিয়াই তাৰ বাবে স্থানীয় লোকসকলক আহ্বান জনাইছে আৰক্ষী-প্ৰশাসনে।
