২০২৩ চনৰ অন্তৱৰ্তীকালীন আদেশ অমান্য কৰাৰ বাবে সোমবাৰে বোম্বে উচ্চ ন্যায়ালয়ে পতঞ্জলি আয়ুৰ্বেদ লিমিটেডৰ বিৰুদ্ধে ৪ কোটি টকাৰ জৰিমনা বিহিছে।
এই নিৰ্দেশত মংগলম অৰ্গেনিকছ লিমিটেডে দাখিল কৰা ‘ট্ৰেডমাৰ্ক’ উলংঘাৰ গোচৰৰ সম্পৰ্কত পতঞ্জলিক কৰ্পূৰ সামগ্ৰী বিক্ৰীত নিষেধাজ্ঞা আৰোপ কৰা হয়।
ন্যায়াধীশ আৰ আই চাগলাৰ একক বিচাৰপীঠে কয় যে পতঞ্জলিয়ে “ইচ্ছাকৃতভাৱে” আদালতৰ নিৰ্দেশ উলংঘা কৰাটো স্পষ্ট হৈ পৰিছে।
আদালতৰ স্থগিতাদেশৰ পাছতো পতঞ্জলিৰ বিৰুদ্ধে কৰ্পূৰ সামগ্ৰী বিক্ৰী কৰাৰ বাবে অৱমাননামূলক ব্যৱস্থা বিচৰা মংগলম অৰ্গেনিকছ লিমিটেডে দাখিল কৰা আবেদন বিচাৰপীঠে নিষ্পত্তি কৰে।
ন্যায়াধীশ চাগলাই পতঞ্জলিক দুসপ্তাহত ৪ কোটি টকা জমা কৰিবলৈ নিৰ্দেশ দিয়ে। ইয়াৰ পূৰ্বে চলিত মাহৰ আৰম্ভণিতে আদালতে কোম্পানীটোক ৫০ লাখ টকা জমা কৰিবলৈ নিৰ্দেশ দিছিল।
মংগলম অৰ্গেনিকছে পতঞ্জলিৰ বিৰুদ্ধে তেওঁলোকৰ কৰ্পূৰ সামগ্ৰীৰ ‘কপিৰাইট’ উলংঘাৰ অভিযোগ উত্থাপন কৰিছিল। পিছত মংগলম অৰ্গেনিকছে পতঞ্জলিয়ে অন্তৱৰ্তীকালীন আদেশ উলংঘা কৰি কৰ্পূৰ সামগ্ৰী বিক্ৰী কৰা বুলি দাবী কৰি আবেদন দাখিল কৰে।
