দুৰ্গা পূজাৰ পূৰ্বে অনুষ্ঠিত হ’বলগীয়া বিটিআৰ নিৰ্বাচনৰ বাবে তৎপৰ হৈ পৰা মুখ্যমন্ত্ৰী ড০ হিমন্ত বিশ্ব শৰ্মাই আজি তামুলপুৰ জিলা বিজেপিৰ উদ্যোগত বাক্সাৰ বাগানপাৰাত অনুষ্ঠিত বাগানপাৰা পৰিষদীয় সমষ্টিৰ বিজয় সংকল্প সভাত অংশ লয়।
বাগানপাৰাত অনুষ্ঠিত বিজয় সংকল্প সভাত উপস্থিত থাকি সাংবাদিকৰ আগত কেইবাটাও গুৰুত্বপূৰ্ণ মন্তব্য কৰে মুখ্যমন্ত্ৰী হিমন্ত বিশ্ব শৰ্মাই।
সাংবাদিকৰ আগত মুখ্যমন্ত্ৰী শৰ্মাই কয়, ‘বিপিএফ, ইউপিপিএল আৰু অঞ্জলি দৈমাৰীৰ এপিবি একত্ৰিত হ’লে খুব ভাল হয়, মই ভাল পাও।’
কংগ্ৰেছ সাংসদ গৌৰৱ গগৈয়ে মিঞা প্ৰসংগ উত্থাপন কৰি মিঞাসকলক ন-অসমীয়া আখ্যা দিয়া প্ৰসংগত মন্তব্য কৰি কয় মুখ্যমন্ত্ৰী শৰ্মাই কয়, ‘অসমীয়াৰ কাৰণে আমাৰ ঠাই নাই, ন-অসমীয়ক ক’ত জাগা দিম। গৌৰৱ গগৈয়ে ন-অসমীয়াক ৰাহুল গান্ধীৰ ঘৰত থব।’
ইফালে ভিচিডিচি ব্যৱস্থাটোৰ পৰিবৰ্তন হ’ব লাগিব বুলি উল্লেখ কৰি মুখ্যমন্ত্ৰী শৰ্মাই কয়, ‘ব্যৱস্থাটো ঠিক নহয়। আমাৰ মানুহো তাত আছে। কিন্তু ব্যৱস্থাটোৰ পৰিবৰ্তন কৰিব বিচাৰিছো।’
কালিৰ দিনটোত অসম জাতীয়তাবাদী যুৱ ছাত্ৰ পৰিষদে কা’ আইনৰ অধীনত অসম চৰকাৰে ২০১৪ চনৰ ৩১ ডিচেম্বৰৰ পূৰ্বে অহা বিদেশী গোচৰ প্ৰত্যাহাৰ কৰিবলৈ দিয়া নিৰ্দেশনাৰ বিৰুদ্ধে কৰা প্ৰতিবাদ সন্দৰ্ভত মুখ্যমন্ত্ৰীয়ে কয় যে AJYCP য়ে মোক সুধিলে মই ফোনত কৈ দিলোহেঁতেন। কিন্তু তেওঁলোকে নিজাকৈ আন্দোলন কৰিছে আমাৰ ক’বলগীয়া নাই।
আনহাতে ৰাজ্যজুৰি চলি থকা উচ্ছেদ প্ৰসংগত তেওঁ কয়, ‘বিটিআৰৰ উচ্ছেদ সন্দৰ্ভত মই এতিয়াই একো নকওঁ। এতিয়া নিৰ্বাচন আহিছে। উচ্ছেদক লৈ মই ৰাজনীতি কৰিব বিচৰা নাই।’
বিজেপিয়ে শান্তি-সম্প্ৰীতি ৰক্ষা নকৰা বুলি ইউপিপিএলে কৰা মন্তব্য সন্দৰ্ভত মুখ্যমন্ত্ৰীয়ে কয় যে মই কাৰো বিৰোধিতা কৰা নাই। আজি পৰ্যন্ত মই বিপিএফ বা ইউপিপিএলৰ বিৰুদ্ধে এটা কথাও কোৱা নাই। আনকি আজিলৈ মই প্ৰাক্তন মুখ্যমন্ত্ৰীকো সমালোচনা কৰা নাই।
নগাৰ মাটি উচ্ছেদ প্ৰসংগত যুক্তি দি গৈ মুখ্যমন্ত্ৰীয়ে কয় ‘মোৰ কলিজা সৰু নহয়। মই ভয় নাখাও। মোক ভয় খুৱাব বিচাৰি আছে নেকি? উচ্ছেদ হ’বই। মইয়ো মাৰ গাখীৰ খাই ডাঙৰ হোৱা।’
বাগানপাৰাত অনুষ্ঠিত এই বিজয় সংকল্প সভাত মুখ্যমন্ত্ৰীৰ সৈতে উপস্থিত থাকে ৰাজ্যিক বিজেপিৰ সভাপতি তথা সাংসদ দিলীপ শইকীয়া, জিলাখনৰ তত্বাৱধায়ক মন্ত্ৰী জয়ন্ত মল্ল বৰুৱাৰ লগতে আন কেইভাজনো শীৰ্ষ নেতা-কৰ্মী।
