সমগ্ৰ বিশ্বত প্ৰতিবছৰে ১০ ডিচেম্বৰ তাৰিখে পালন কৰা হয় আন্তঃৰাষ্ট্ৰীয় মানৱ অধিকাৰ দিৱস। ৰাষ্ট্ৰসংঘৰ ১৯৪৮ চনৰ ১০ ডিচেম্বৰত, মানৱ অধিকাৰৰ সাৰ্বজনীন ঘোষণা (ইউডিএইচআৰ), মানৱ অধিকাৰৰ প্ৰথম বিশ্বব্যাপী ঘোষণা আৰু নতুন ৰাষ্ট্ৰসংঘৰ প্ৰথমটো মুখ্য সফলতাৰ প্ৰতি সন্মান প্ৰদৰ্শন কৰি এই তাৰিখটো মানৱ অধিকাৰ দিৱস হিচাপে বাছনি কৰা হৈছিল।
অৰ্থাৎ ৰাষ্ট্ৰসংঘৰ সাধাৰণ সভাই ১৯৪৮ চনত সাৰ্বজনীন মানৱ অধিকাৰ ঘোষণা পত্ৰ গ্ৰহণ কৰাৰ চিনস্বৰূপে ১৯৫০ চনৰ পৰা প্ৰতিবছৰে ১০ ডিচেম্বৰত এই দিৱস পালন কৰি অহা হৈছে।
মানৱ অধিকাৰ দিৱসৰ উদ্দেশ্য হৈছে সমগ্ৰ বিশ্বৰ লোকসকলক মানৱ অধিকাৰৰ গুৰুত্বৰ বিষয়ে সজাগ কৰা আৰু ইয়াক পালন কৰাৰ বিষয়ত সজাগ হোৱা। প্ৰতি বছৰে ১০ ডিচেম্বৰৰ দিনটোত চৰকাৰী পক্ষৰ উপৰিও বেচৰকাৰী সংগঠনসমূহ, সাধাৰণ লোকসকলে মানৱ অধিকাৰৰ বিষয়ে সজাগতা সৃষ্টিৰ বাবে আৰু মানৱ অধিকাৰ সুৰক্ষিত কৰিবলৈ কাম কৰাৰ উদ্দেশ্যৰে একত্ৰিত হৈ আহিছে।
প্ৰতি বছৰে আন্তঃৰাষ্ট্ৰীয় মানৱ অধিকাৰ দিৱসৰ এক পৃথক বিষয়বস্তু নিৰ্ধাৰণ কৰা হয়। এই বছৰৰ বিষয়বস্তু হৈছে দৈনন্দিন জীৱনত মানৱ অধিকাৰৰ গুৰুত্ব আৰু প্ৰাসংগিকতা স্বীকাৰ কৰাৰ আহ্বান।
ৰাষ্ট্ৰসংঘৰ এক প্ৰস্তাৱত কোৱা হৈছে, “মানৱ অধিকাৰে ব্যক্তি আৰু সম্প্ৰদায়ক এক উন্নত ভৱিষ্যত গঢ়ি তুলিবলৈ ক্ষমতা প্ৰদান কৰিব পাৰে। মানৱ অধিকাৰৰ সম্পূৰ্ণ শক্তিক আমি বিচৰা পৃথিৱীৰ পথ হিচাপে গ্ৰহণ আৰু বিশ্বাস কৰি, আমি অধিক শান্তিপূৰ্ণ, সমান আৰু বহনক্ষম হ’ব পাৰোঁ।”
এই মানৱ অধিকাৰ দিৱসত মানৱ অধিকাৰ কেনেদৰে এক সমাধানৰ পথ, প্ৰতিৰোধৰ বাবে এক গুৰুত্বপূৰ্ণ ভূমিকা গ্ৰহণ, সুৰক্ষামূলক আৰু পৰিৱৰ্তনশীল শক্তি হিচাপে গুৰুত্বপূৰ্ণ ভূমিকা পালন কৰাৰ ওপৰত গুৰুত্ব আৰোপ কৰা হয়।
