চেম্পিয়নছ ট্ৰফীক লৈ চলি থকা বিতৰ্কই এইবাৰ লৈছে আন এক নতুন মোৰ। অহা বছৰ ১৯ ফেব্ৰুৱাৰীৰ পৰা আৰম্ভ হ’বলগীয়া এই প্ৰতিযোগিতাখনৰ আয়োজকৰ দায়িত্বত আছে পাকিস্তান। অৱশ্যে এই পৰ্যন্ত আনুষ্ঠানিকভাৱে প্ৰকাশ পোৱা নাই প্ৰতিযোগিতাখনৰ চূড়ান্ত সময়সূচী।
বিভিন্ন বিতৰ্কৰ বাবে চৰ্চাত থকা এই প্ৰতিযোগিতাখনক লৈ এইবাৰ আহিছে এক ডাঙৰ খবৰ। লাভ কৰা শেহতীয়া খবৰ অনুসৰি এই প্ৰতিযোগিতাখন এদিনীয়াৰ সলনি টি-২০ ফৰ্মেটত হোৱাৰ সম্ভাৱনা আছে।
আই চি চিৰ গাইডলাইন অনুসৰি প্ৰতিযোগিতাৰ সময়সূচী ১০০ দিন আগতীয়াকৈ ঘোষণা কৰিব লাগে। যদি ২০২৫ চনৰ ১৯ ফেব্ৰুৱাৰীৰ পৰা চেম্পিয়নছ ট্ৰফী আৰম্ভ হ’য়, তেন্তে ২০২৪ চনৰ ১২ নৱেম্বৰৰ ভিতৰত সূচী ঘোষণা কৰিব লাগিছিল।
উল্লেখ্য যে, ভাৰতে প্ৰতিযোগিতাখনৰ বাবে পাকিস্তান ভ্ৰমণ নকৰাৰ সিদ্ধান্তৰ বাবেই সূচী প্ৰকাশ কৰাত পলম হৈছে। ভাৰতৰ এই সিদ্ধান্তৰ বাবে প্ৰতিযোগিতাখন হাইব্ৰিড মডেলত অনুষ্ঠিত হোৱা সন্দৰ্ভতো আলোচনা চলি আছে। এতিয়া সূচী প্ৰকাশৰ পিছতহে জানিব পৰা যাব প্ৰতিযোগিতাখনৰ খেলসমূহ কিদৰে আৰু ক’ত অনুষ্ঠিত হ’ব।
প্ৰতিযোগিতাখনৰ বাবে হাতত মাত্ৰ আৰু দুটামাহ বাকী থকা অৱস্থাত ভাৰত-পাকিস্তানৰ মাজত চলি থকা বিবাদৰ বাবে প্ৰতিযোগিতাখনৰ সময়সূচী প্ৰকাওশ কৰিব নোৱাৰাত আই চি চিয়ে ডাঙৰ সিদ্ধান্ত গ্ৰহণ কৰিব। দীৰ্ঘদিনৰ পৰা এদিনীয়া ফৰ্মেটত চলি থকা এই প্ৰতিযোগিতাখনত টি-২০ ফৰ্মেটত অনুষ্ঠিত কৰাৰ চিন্তা-চৰ্চা চলা বুলিও এক বিশেষ সূত্ৰৰ পৰা জানিব পৰা গৈছে।
