মহিলা বিশ্বকাপৰ খিতাপ জয় কৰাৰ পিছত ভাৰতীয় দলটোৱে বুধবাৰে প্ৰধানমন্ত্ৰীৰ বাসগৃহত উপস্থিত হৈ প্ৰধানমন্ত্ৰী নৰেন্দ্ৰ মোদীক সাক্ষাৎ কৰে। দলটোক সাক্ষাৎ কৰি প্ৰধানমন্ত্ৰীয়ে এই ঐতিহাসিক জয়ৰ বাবে অভিনন্দন জনোৱাৰ লগতে খেলুৱৈসকলৰ সৈতেও বিশেষ আলোচনা কৰে।
এই বৈঠকৰ সময়ত তেওঁ বিশ্বকাপত একেৰাহে তিনিবাৰ পৰাজয়ৰ পাছতো নিজৰ মনোবল বজাই ৰখা আৰু এই কঠিন সময়ছোৱাৰ মাজেৰে পাৰ হৈ নিজৰ ‘অধ্যৱসায় আৰু প্ৰত্যাৱৰ্তন’ প্ৰদৰ্শন কৰি প্ৰথম খিতাপ দখল কৰা দলটোৰ মনোভাৱক ভূয়সী প্ৰশংসা কৰে।
এই সময়ছোৱাত প্ৰধানমন্ত্ৰীয়ে বিশ্বকাপৰ ট্ৰফীকে ধৰি সকলো খেলুৱৈৰ সৈতে ফটোৰ বাবে পোজ দিছিল। ছচিয়েল মিডিয়াত ভাইৰেল হৈ পৰিছে প্ৰধানমন্ত্ৰীৰ এই ফটো। ফটোখনত স্পষ্টকৈ দেখা গৈছে যে প্ৰধানমন্ত্ৰী মোদীয়ে ট্ৰফীতো হাতেৰে স্পৰ্শ কৰা নাই। দলৰ অধিনায়ক হৰমনপ্ৰীত কৌৰ আৰু উপ-অধিনায়ক স্মৃতি মান্ধনাই ট্ৰফী হাতত লৈছে, আৰু পিএম মোডীক পিছফালে থিয় হৈ থকা দেখা গৈছে।
প্ৰধানমন্ত্ৰীয়ে ট্ৰফী স্পৰ্শ কৰিবলৈ অস্বীকাৰ কৰাটো ক্ৰীড়াবিদ্যাৰ মনোভাৱৰ প্ৰতি তেওঁৰ সন্মানৰ পৰাই উদ্ভৱ হৈছে। বিশ্বাস কৰা হয় যে, ট্ৰফী জয় কৰিবলৈ কঠোৰ পৰিশ্ৰম কৰা খেলুৱৈসকলেহে ট্ৰফী স্পৰ্শ কৰাৰ অধিকাৰ আছে। খেলুৱৈসকলৰ কঠোৰ পৰিশ্ৰমক সন্মান জনাই প্ৰধানমন্ত্ৰীয়ে ট্ৰফী স্পৰ্শ কৰাৰ পৰা বিৰত থাকে।
মন কৰিবলগীয়া যে, ২০২৪ চনৰ টি-২০ বিশ্বকাপ জয় কৰি ভাৰতীয় পুৰুষ দল ভাৰতলৈ অহাৰ পিছত প্ৰধানমন্ত্ৰী মোদীয়ে একে কাম কৰিছিল। তেওঁ অধিনায়ক ৰোহিত শৰ্মা আৰু মুখ্য প্ৰশিক্ষক ৰাহুল দ্ৰাবিড়ৰ হাতত ধৰিছিল, দুয়োজনে ট্ৰফী হাতত লৈছিল।
