ভাৰতৰ বৈদেশিক সচিব বিক্ৰম মিশ্ৰীয়ে ৩১ আগষ্টত কয় যে প্ৰধানমন্ত্ৰী নৰেন্দ্ৰ মোদীয়ে চীনৰ টিয়ানজিনত অনুষ্ঠিত হোৱা চাংহাই সহযোগিতা সংস্থাৰ সন্মিলনত অংশগ্ৰহণ কৰিছে বুলি উল্লেখ কৰি তেওঁ কয় যে প্ৰধানমন্ত্ৰী মোদীৰ প্ৰথম গুৰুত্বপূৰ্ণ বৈঠক চীনৰ ৰাষ্ট্ৰপতি ছি জিনপিঙৰ সৈতে হৈছিল। এই বৈঠক সন্দৰ্ভত আনুষ্ঠানিক বিবৃতি জাৰি কৰা হৈছে বুলি মিশ্ৰীয়ে উল্লেখ কৰে।
তেওঁ কয় যে এবছৰ নৌহওঁতেই দুয়োগৰাকী নেতাৰ এইখন দ্বিতীয় বৈঠক। বিগত বৰ্ষৰ ২০২৪ চনৰ অক্টোবৰ মাহত কাজানত শেষবাৰৰ বাবে তেওঁলোকৰ সাক্ষাৎ হৈছিল, য’ত দুয়োগৰাকী নেতাই দ্বিপাক্ষিক সম্পৰ্কৰ বিকাশৰ বাবে কিছুমান কৌশলগত নিৰ্দেশনা নিৰ্ধাৰণ কৰিছিল আৰু লগতে দুয়োপক্ষৰ বাবে কিছুমান সুনিৰ্দিষ্ট লক্ষ্যও নিৰ্ধাৰণ কৰিছিল।
সংবাদমেলত বৈদেশিক সচিব বিক্ৰম মিশ্ৰীয়ে কয় যে বৈঠকত দুয়োগৰাকী নেতাই এই কথাত গুৰুত্ব আৰোপ কৰে যে ভাৰত আৰু চীনে নিজৰ নিজৰ ঘৰুৱা উন্নয়নত মনোনিৱেশ কৰিছে আৰু এই প্ৰক্ৰিয়াত তেওঁলোক প্ৰতিদ্বন্দ্বী নহয়, অংশীদাৰ হোৱা উচিত। মতানৈক্য বিবাদলৈ পৰিণত হ’ব নালাগে আৰু সুস্থিৰ আৰু বন্ধুত্বপূৰ্ণ সম্পৰ্কই দুয়োখন দেশৰ ২.৮ বিলিয়ন জনসাধাৰণৰ উপকাৰিতাৰ হ’ব বুলি একমত প্ৰকাশ কৰে।
তেওঁ কয় যে ৰাষ্ট্ৰপতি ছি জিনপিঙে সহযোগিতা শক্তিশালী কৰাৰ বাবে চাৰিটা পৰামৰ্শ আগবঢ়াইছিল। যাৰ প্ৰতি ইতিবাচক সঁহাৰি জনাইছে প্ৰধানমন্ত্ৰী মোদীয়ে। প্ৰধানমন্ত্ৰী মোদীয়ে স্পষ্ট কৰি দিয়ে যে, দ্বিপাক্ষিক সম্পৰ্কৰ অগ্ৰগতিৰ বাবে সীমান্ত অঞ্চলত শান্তি আৰু স্থিতিশীলতা প্ৰয়োজনীয়। দুয়োগৰাকী নেতাই পাৰস্পৰিক বিকাশ, বাণিজ্যিক ভাৰসাম্য, সন্ত্ৰাসবাদৰ বিৰুদ্ধে যুঁজ আৰু জনসাধাৰণৰ সংস্পৰ্শ বৃদ্ধি আদি বিষয়সমূহৰ ওপৰত আলোচনা কৰে। ভাৰত আৰু চীনে বহুমেৰু এছিয়া সৃষ্টিৰ দিশত একেলগে কাম কৰিব লাগে বুলিও তেওঁলোকে একমত প্ৰকাশ কৰে।
