ভাৰত আৰু কুৱেইটৰ মাজত সম্পৰ্ক হ’ব আৰু অধিক সুদৃঢ়। দুয়োখন দেশে পাৰস্পৰিক সহযোগিতা বৃদ্ধিৰ বাবে যৌথ আয়োগ গঠন কৰিছে।
ভাৰতৰ বৈদেশিক মন্ত্ৰী এছ জয়শংকৰ আৰু কুৱেইটৰ বৈদেশিক মন্ত্ৰী আব্দুল্লা আলী আল ইয়াহিয়াই দ্বিপাক্ষিক বৈঠকত এই সিদ্ধান্ত গ্ৰহণ কৰে। ৩ ডিচেম্বৰৰ নিশা অৰ্থাৎ মঙলবাৰে দিল্লীত উপস্থিত হৈছিল কুৱেইটৰ বৈদেশিক মন্ত্ৰী আলী আল-ইয়াহিয়া। ভাৰতৰ বৈদেশিক পৰিক্ৰমা মন্ত্ৰী এছ জয়শংকৰৰ সৈতে বুধবাৰে দিল্লীত দ্বিপাক্ষিক বৈঠকত মিলিত হয়।
এই বৈঠকত দুয়োখন দেশৰ মাজত বাণিজ্য, বিনিয়োগ, শক্তি, তথ্য প্ৰযুক্তি, সাংস্কৃতিক আৰু কূটনৈতিক ক্ষেত্ৰত সম্পৰ্ক শক্তিশালী কৰাৰ বিষয়ে আলোচনা কৰা হয়। ইয়াৰ উপৰিও দুয়োখন দেশৰ বৈদেশিক মন্ত্ৰীসকলে পশ্চিম এছিয়াৰ পৰিস্থিতিকে ধৰি পাৰস্পৰিক স্বাৰ্থৰ আঞ্চলিক আৰু আন্তঃৰাষ্ট্ৰীয় বিষয়সমূহৰ ওপৰতো আলোচনা কৰে। জয়শংকৰ আৰু ইয়াহিয়াই সহযোগিতাৰ যুটীয়া আয়োগ (জেচিচি) গঠনৰ বুজাবুজি চুক্তি স্বাক্ষৰ কৰে।
যুটীয়া সহযোগিতা আয়োগে দ্বিপাক্ষিক সম্পৰ্কৰ সামগ্ৰিক মাত্ৰাক ব্যাপকভাৱে পৰ্যালোচনা আৰু নিৰীক্ষণৰ বাবে এক ব্যাপক ব্যৱস্থা হিচাপে কাম কৰিব। হাইড্ৰ’কাৰ্বন, স্বাস্থ্য আৰু কনছুলাৰ বিষয়ত বৰ্তমানৰ কৰ্মগোটসমূহো জেচিচিয়ে তদাৰক কৰিব। আব্দুল্লা আলী আল ইয়াহিয়াৰ বৈদেশিক মন্ত্ৰী হিচাপে ভাৰত ভ্ৰমণৰ এইটোৱেই আছিল প্ৰথম।
দ্বিপাক্ষিক বৈঠকৰ সময়ত জয়শংকৰে উপসাগৰীয় সহযোগিতা পৰিষদৰ সফল নেতৃত্বৰ বাবে কুৱেইটক অভিনন্দন জনোৱাৰ লগতে কুৱেইটত ভাৰতীয় সম্প্ৰদায়ৰ যত্ন লোৱাৰ বাবে তেওঁৰ সমকক্ষক ধন্যবাদ জ্ঞাপন কৰে। তেওঁ কয় যে আমাৰ দুয়োখন দেশৰ মাজত দীৰ্ঘদিন ধৰি বন্ধুত্ব আছে। বাণিজ্য, বিনিয়োগ, শক্তি, তথ্য-প্ৰযুক্তি, সংস্কৃতি আৰু কনছুলাৰ সম্পৰ্ককে ধৰি বিভিন্ন ক্ষেত্ৰত আমাৰ দ্বিপাক্ষিক সম্পৰ্ক শক্তিশালী কৰাৰ বাবে তেওঁলোক প্ৰতিশ্ৰুতিবদ্ধ বুলি জানিবলৈ দিয়ে।
ভ্ৰমণৰ সময়ত ইয়াহ্যাই প্ৰধানমন্ত্ৰী নৰেন্দ্ৰ মোদীকো সাক্ষাৎ কৰে। তেওঁ কয় যে, ভাৰতীয় নাগৰিকৰ কল্যাণ নিশ্চিত কৰাৰ বাবে কুৱেইটৰ নেতৃত্বক প্ৰধানমন্ত্ৰী মোদীয়ে শলাগ লৈছে। দুয়োখন দেশৰ ঐতিহাসিক আৰু গভীৰ সম্পৰ্কক আগুৱাই নিয়াৰ ক্ষেত্ৰতো আত্মবিশ্বাস প্ৰকাশ কৰে। প্ৰধানমন্ত্ৰী মোডীক বিশ্বৰ অন্যতম বুদ্ধিমান ব্যক্তি বুলি অভিহিত কৰে ইয়াহিয়াই। তেওঁ কয় যে, প্ৰধানমন্ত্ৰী মোদীয়ে ভাৰতক এক উন্নত স্তৰলৈ লৈ গৈছে আৰু ভৱিষ্যতেও তেওঁ ইয়াক আৰু অধিক আগুৱাই নিব।
