বৰ্ডাৰ-গাভাস্কাৰ ট্ৰফীৰ বাবে বৰ্তমান ব্যস্ত ভাৰতীয় ক্ৰিকেট দল। এই শৃংখলাটোৰ দুখন মেচ অনুষ্ঠিত হৈ গৈছে আৰু দুয়োটা দলে এখন এখন মেচ জয়ী হৈছে। এই শৃংখলাটোৰ অন্তিমখন মেচ অহা বৰ্ষৰ ৩ জানুৱাৰিৰ পৰা ছিডনীত অনুষ্ঠিত হ’ব।
এই শৃংখলাটো অন্ত পৰাৰ পিছতে অহা বৰ্ষৰ জুন মাহত ভাৰতে ভ্ৰমণ কৰিব ইংলেণ্ড। এই সময়ছোৱাত ভাৰতে ঘৰুৱা দল ইংলেণ্ডৰ বিৰুদ্ধে পাঁচখন মেচৰ টেষ্ট শৃংখলাত অংশ ল’ব। ৱৰ্ল্ড টেষ্ট চেম্পিয়নশ্বিপৰ ফাইনেলৰ পিছতেই আৰম্ভ হ’ব এই শৃংখলাটো।
প্ৰায় ২০০ দিন পিছত আৰম্ভ হ’বলগীয়া এই শৃংখলাটোক লৈ শেহতীয়াকৈ এক খবৰ পোহৰলৈ আহিছে যিটোৱে ক্ৰিকেট অনুৰাগীৰ মাজত যথেষ্ট প্ৰতিক্ৰিয়াৰ সৃষ্টি কৰিছে। ইংলেণ্ডৰ বিৰুদ্ধে শৃংখলাৰ দ্বিতীয়খন মেচ বাৰ্মিংহামত অনুষ্ঠিত হ’ব। লাভ কৰা খবৰ অনুসৰি এই মেচখনৰ প্ৰথম চাৰিটা দিনৰ সকলো টিকট বিক্ৰী হৈছে।
ভাৰত বনাম ইংলেণ্ডৰ মাজত হ’বলগীয়া দ্বিতীয়খন মেচ ২০২৫ বৰ্ষৰ ২ জুলাইৰ পৰা আৰম্ভ হ’ব। এই মেচখন আৰম্ভ হ’বলৈ মাজত আছে ২০৩ দিন। ৭ মাহ পূৰ্বেই মেচখনৰ প্ৰথম চাৰিদিনৰ টিকট বিক্ৰী হোৱা খবৰে প্ৰমাণ কৰিছে ভাৰত-ইংলেণ্ডৰ মাজৰ অনুৰাগীৰ মাজত থকা ক্ৰিকেট প্ৰীতি। এতিয়া যদিহে কোনো ক্ৰিকেট অনুৰাগীয়ে মেচখন উপভোগ কৰিব বিচাৰে তেন্তে পঞ্চম দিনৰ বাবেহে টিকট ক্ৰয় কৰিব লাগিব।
এজবেষ্টন ষ্টেডিয়ামৰ টুইটাৰ হেণ্ডেলৰ জৰিয়তে মেচখনৰ প্ৰথম চাৰিদিনৰ টিকট ইতিমধ্যেই বিক্ৰী হোৱা বুলি জানিব দিয়ে।
উল্লেখ্য যে, যদিহে এছেজ শৃংখলাক বাদ দিও তেন্তে এইবাৰ প্ৰথমবাৰৰ বাবে এখন মেচৰ প্ৰথম চাৰিদিনৰ টিকট আগতীয়াকৈ বিক্ৰী হোৱাৰ অভিলেখ গঢ়িছে।
ভাৰত-ইংলেণ্ডৰ মাজত হ’বলগীয়া এই শৃংখলাটোক নাম দিছে পাটৌদি ট্ৰফী। শৃংখলাটোৰ প্ৰথমখন মেচ ২০ জুনৰ পৰা লীডছত আৰম্ভ হ’ব।
