কিছুদিন পূৰ্বে নিজ বাসগৃহতে দুৰ্বৃত্তৰ আক্ৰমণৰ বলি হোৱা বলিউড অভিনেতা ছেইফ আলী খানৰ ঘটনাৰ তদন্ত প্ৰক্ৰিয়া সম্পূৰ্ণ হোৱাৰ পূৰ্বেই বীমা কোম্পানীয়ে লাখ লাখ টকাৰ ‘ক্লেইম’ আদায় দিয়াৰ ঘটনাই তীব্ৰ প্ৰতিক্ৰিয়াৰ সৃষ্টি কৰিছে।
এই সমগ্ৰ ঘটনা পোহৰলৈ অহাৰ পিছতে এতিয়া এই বিষয়টো প্ৰশ্নৰ আওতালৈ আহিছে। AMC অৰ্থাৎ এছ’চিয়েশ্যন অৱ মেডিকেল কনচালটেণ্টে IRDAI অৰ্থাত ভাৰতীয় বীমা নিয়ন্ত্ৰণ আৰু উন্নয়ন কৰ্তৃপক্ষক এটা প্ৰশ্ন কৰিছে যে গোচৰৰ তদন্ত সম্পূৰ্ণ নকৰাকৈ অভিনেতাজনৰ চিকিৎসালয়ৰ ‘ক্লেইম’ কেনেকৈ সহজে গৃহীত হ’ল?
এনে পৰিস্থিতিত বীমা কোম্পানীটোৰ বিৰুদ্ধে বিভিন্ন প্ৰশ্ন উত্থাপন হোৱাৰ লগতে সমালোচনাৰো সন্মুখীন হৈছে কোম্পানীটো।
ছ’চিয়েল মিডিয়াত সাধাৰণ জনতাই প্ৰশ্ন কৰিছে যে ছেইফ আলী খানৰ ক্ষেত্ৰত এই ‘ক্লেইম’ অতি সহজ আৰু অতি ক্ষীপ্ৰতাৰে গৃহীত হৈছিল। যিহেতু সাধাৰণ জনতাৰ লগত এনে নহয়, সাধাৰণ লোকৰ ‘ক্লেইম’ গৃহীত হ’বলৈ বহু সময় অপেক্ষা কৰিবলগীয়া হয়। সাধাৰণ লোকে এই ঘটনাটোক বৈষম্যৰ গোচৰ বুলি অভিহিত কৰিছে।
বিভিন্ন প্ৰশ্ন উত্থাপন হোৱাত এতিয়া এই বিষয়টো সন্দৰ্ভত IRDAI-এ কি স্পষ্টীকৰণ দিয়ে সেয়া লক্ষ্যণীয় হ’ব। কাৰণ AMC এ IRDAIক প্ৰশ্ন কৰিছে আৰু এতিয়া IRDAI এ অভিনেতাজনৰ বীমাৰ ‘ক্লেইম’ আদায় দিয়া বীমা কোম্পানীটোক প্ৰশ্ন কৰাৰ সম্ভাৱনা আছে।
AMC-এ লিখা পত্ৰখনত ইয়াক চিকিৎসা বীমা উদ্যোগত বৈষম্যৰ উদাহৰণ হিচাপে আখ্যা দিয়া হৈছে। পত্ৰখনত কোৱা হৈছে যে হাই প্ৰফাইল লোক আৰু কৰ্পৰেট পলিচিধাৰীয়ে প্ৰায়ে বিপুল ধনৰ দাবী সহজেই পায়। কিন্তু সাধাৰণ জনতাই একেধৰণৰ দাবী পাবলৈ বহু সময় অপেক্ষা কৰে। এনেকুৱা কিয় হয়?
উল্লেখ্য যে, কিছুদিন পূৰ্বে ছ’চিয়েল মিডিয়াত এটা স্ক্ৰীণশ্বট ভাইৰেল হৈ পৰিছিল য’ত কোৱা হৈছিল যে ছেইফ আলী খানৰ হাস্পতালৰ বিল প্ৰায় ৩৬ লাখ টকা, ইয়াৰে ২৫ লাখৰ বীমা ‘ক্লেইম’ তৎক্ষণাত গৃহীত হৈছিল। এই ঘটনা ভাইৰেল হোৱাৰ পিছতে ছ’চিয়েল মিডিয়াত সাধাৰণ ৰাইজৰ মাজত ক্ষোভ দেখা গৈছে।
