সুকলমে দিল্লীৰ ইন্দিৰা গান্ধী আন্তঃৰাষ্ট্ৰীয় বিমানবন্দৰত উপস্থিত হৈছে ইৰাণত আৱদ্ধ হৈ থকা ১১০ গৰাকী ভাৰতীয় ছাত্ৰই। ইয়াৰে অধিকাংশ আছিল ছাত্ৰ-ছাত্ৰী জম্মু-কাশ্মীৰৰ। এইসকল ছাত্ৰ-ছাত্ৰী হৈছে উৰমিয়া মেডিকেল ইউনিভাৰ্চিটিৰ।
ইৰাণ আৰু ইজৰাইলৰ মাজত চলি থকা যুদ্ধৰ পৰিপ্ৰেক্ষিতত ভাৰত চৰকাৰে ইৰাণত আৱদ্ধ হৈ থকা ভাৰতীয় নাগৰিকসকলে নিৰাপদে উভতি অহাৰ বাবে ‘অপাৰেচন সিন্ধু’ আৰম্ভ কৰে। চৰকাৰৰ এই বিশেষ অভিযানৰ অধীনত ইৰাণৰ উত্তৰ প্ৰান্তত আৱদ্ধ হৈ থকা ১১০ জন ভাৰতীয় ছাত্ৰ-ছাত্ৰীক ১৭ জুনত নিৰাপদে উলিয়াই অনা হয়। এই ছাত্ৰ-ছাত্ৰীসকলক ভাৰতীয় দূতাবাসৰ তত্বাৱধানত পথেৰে ইৰাণৰ পৰা আৰ্মেনিয়াৰ ৰাজধানী ইৰেভানলৈ লৈ যোৱা হয়। এই পথেৰে দিল্লীলৈ আহিছে।
বুধবাৰে বিয়লি ২:৫৫ বজাত বিশেষ বিমানেৰে ভাৰতলৈ ৰাওনা হোৱা আটাইকেইগৰাকী ছাত্ৰ-ছাত্ৰীয়ে বৃহস্পতিবাৰে পুৱা নতুন দিল্লীত আহি উপস্থিত হয়। এয়া প্ৰথম পৰ্যায়ৰ অপাৰেচন সিন্ধু। এই সমগ্ৰ অভিযানত সহযোগিতা আগবঢ়োৱা ইৰাণ আৰু আৰ্মেনিয়া চৰকাৰৰ প্ৰতি ভাৰত চৰকাৰে বিশেষ কৃতজ্ঞতা প্ৰকাশ কৰিছে, যিসকলে উদ্ধাৰ অভিযান সহজ আৰু নিৰাপদ কৰি তোলাত সহায় কৰিছিল।
ইৰাণৰ পৰিস্থিতি অধিক ভয়াৱহ হোৱাৰ বাবে ভাৰতীয় দূতাবাসে যুদ্ধবিধ্বস্ত অঞ্চলৰ পৰা ভাৰতীয় নাগৰিকক নিৰাপদ স্থানলৈ পঠিয়াবলৈ অহৰহ চেষ্টা অব্যাহত ৰাখিছে। ইয়াৰ সমান্তৰালকৈ ভাৰত চৰকাৰে জৰুৰীকালীন যোগাযোগ নম্বৰ, হোৱাটছএপ নম্বৰ আৰু ই-মেইল আইডি মুকলি কৰিছে।
ইৰাণ আৰু ইজৰাইলৰ মাজত চলি থকা যুদ্ধই ভয়ংকৰ ৰূপ ধাৰণ কৰিছে। বুধবাৰে ইজৰাইলে দাবী কৰে যে তেওঁলোকৰ বায়ুসেনাই ৫০খন যুদ্ধ বিমান প্ৰেৰণ কৰি ইৰাণক আক্ৰমণ কৰিছে। একে সময়তে ইৰাণে ড্ৰ’নৰ জৰিয়তে ইজৰাইলক আক্ৰমণ কৰিছিল।
