ইৰাণৰ পৰা ভাৰতীয় নাগৰিকক উলিয়াই আনিবলৈ সষ্টম হৈ আছে ভাৰতীয় বায়ুসেনা। সূত্ৰ অনুসৰি, চৰকাৰৰ পৰা নিৰ্দেশ পোৱাৰ লগে লগে বায়ুসেনাৰ বিমানখন আৰ্মেনিয়া বা আন চুবুৰীয়া দেশলৈ যাব পাৰে য’ত ভাৰতীয়সকলক যাবলৈ কোৱা হৈছে। কাৰণ যুদ্ধৰ বাবে ইৰাণৰ আকাশমাৰ্গ সম্পূৰ্ণৰূপে বন্ধ হৈ পৰিছে।
সূত্ৰ অনুসৰি, ভাৰতীয় বায়ুসেনাৰ এয়াৰলিফ্ট পৰিকল্পনা এনে প্ৰতিকূল পৰিস্থিতিৰ বাবে সদায় সাজু হৈ থাকে। এনে অভিযানৰ বাবে বায়ুসেনাৰ চি-১৭ গ্ল’বমাষ্টাৰ, আই এল-৭৬ আৰু চি-১৩০জে ছুপাৰ হাৰকিউলিছ সামৰিক পৰিবহণ বিমান ব্যৱহাৰ কৰা হয়।
ইৰাণত প্ৰায় ১০ হাজাৰ ভাৰতীয় লোকক নিৰাপদে উলিয়াই অনাৰ প্ৰয়োজন হ’ব পাৰে। ইয়াৰে ভিতৰত আছে বৃহৎ সংখ্যক জম্মু-কাশ্মীৰৰ ছাত্ৰ-ছাত্ৰী, যিসকলে ইৰাণলৈ পঢ়া-শুনাৰ বাবে গৈছে। ভাৰতৰ বৈদেশিক মন্ত্ৰালয়ে সকলো ভাৰতীয়কে ইৰাণৰ ৰাজধানী তেহৰাণ এৰি নিৰাপদ স্থানলৈ যাবলৈ সকীয়াই দিছে। ইৰাণৰ সংলগ্ন চুবুৰীয়া দেশ আৰ্মেনিয়ালৈও যাবলৈ কোৱা হৈছে। প্ৰয়োজন হ’লে চৰকাৰে আৰ্মেনিয়াৰ পৰা এয়াৰলিফ্ট কৰিব পাৰে বুলি বিশ্বাস কৰা হয়।
ইৰাণৰ উপৰিও চুবুৰীয়া দেশ ইৰাক, ছিৰিয়া আৰু জৰ্ডানৰ আকাশমাৰ্গও বন্ধ হৈ আছে। এনে পৰিস্থিতিত আৰ্মেনিয়া একমাত্ৰ দেশ য’ৰ পৰা ভাৰতে নিজৰ নাগৰিকক নিৰাপদে বিমানেৰে লৈ যাব পাৰে। আৰ্মেনিয়াৰ সৈতে ভাৰতৰ বন্ধুত্বপূৰ্ণ সম্পৰ্ক। এই সন্দৰ্ভত স্বয়ং বৈদেশিক পৰিক্ৰমা মন্ত্ৰী এছ জয়শংকৰে আৰ্মেনিয়াৰ সমকক্ষ আৰাৰাট মিৰ্জিয়নৰ সৈতে ফোনযোগে কথা পাতিছে। জয়শংকৰে ইউ এ ইৰ বৈদেশিক মন্ত্ৰী (আৰু উপ-প্ৰধানমন্ত্ৰী) এ বি জায়েদৰ সৈতেও ফোনত কথা পাতিছে।
শেহতীয়া বছৰবোৰত ভাৰতীয় বায়ুসেনাই ভাৰতীয় নাগৰিকক নিৰাপদে অনাত সফল হৈছে, সেয়া ৰাছিয়া-ইউক্ৰেইন যুদ্ধই হওক (২০২২) হওক বা চুডান গৃহযুদ্ধই হওক (২০২৩)। ৰাছিয়া-ইউক্ৰেইন যুদ্ধৰ সময়ত ভাৰতে অপাৰেচন গংগাৰ অধীনত প্ৰায় ২২ হাজাৰ নাগৰিকক উলিয়াই আনিছিল। সেই সময়ত এয়াৰ ইণ্ডিয়াৰ বিমানৰ লগতে বায়ুসেনাৰ চি-১৭ গ্ল’বমাষ্টাৰ বিমান ব্যৱহাৰ কৰা হৈছিল।
চুডানৰ গৃহযুদ্ধৰ সময়ত ভাৰতীয় বায়ুসেনাই অপাৰেচন কাবেৰীৰ বাবে যুদ্ধক্ষেত্ৰত চি-১০ৰ লগতে চি-১৩০জে ছুপাৰ হাৰকিউলিছ বিমান নিয়োগ কৰিছিল। ভাৰতীয় নৌসেনাই অপাৰেচন কাবেৰীৰ সময়তো ভাৰতীয় নাগৰিকক ঘৰলৈ ঘূৰাই অনাতো উল্লেখযোগ্য ভূমিকা পালন কৰিছিল।
